Ադրբեջանի արտգործնախարար Էլմար Մամեդյարովը հայտարարել է, որ հայկական ազգանուններով ՌԴ քաղաքացիները կարող են այցելել Ադրբեջան, սակայն այդ մասին պետք է տեղեկացնեն Մոսկվայում Ադրբեջանի դեսպանատանը՝ ղարաբաղյան հակամարտության պատճառով «հուզական ֆոնից» խուսափելու համար:
Ավելի վաղ Ռուսաստանի քաղաքացի Քրիստինա Գևորգյանը Facebook-ում գրել էր, որ 13 ժամ անցկացրել է Բաքվի միջազգային օդանավակայանում և չի կարողացել մուտք գործել երկիր: Գևորգյանն ասել է, որ բացի իրենից, ևս երկու ընտանիք է նման իրավիճակում հայտնվել՝ հարազատներից մեկի հայկական ազգանվան պատճառով: Ադրբեջանի արտգործնախարարությունը նշել է, որ Գևորգյանի հետ կատարվածը մասնավոր դեպք է և ադրբեջանա-ռուսական հարաբերություններում խնդիրներ չկան:
Իր հերթին, ՌԴ արտգործնախարարությունը հայտարարել է, որ հայկական արմատներով ռուսաստանցու մուտքը երկիր արգելելու Բաքվի մոտեցումն անընդունելի է:
«Եթե կան Ռուսաստանի հայկական ազգանուններով քաղաքացիներ, որոնք ցանկանում են մեկնել Ադրբեջան, ապա՝ խնդրեմ: Բայց, մեր դեսպանատանը տեղեկացնելուց հետո, քանի որ մենք ունենք Ռուսաստանի հետ առանց վիզայի մուտք և նախապես ստացված տեղեկատվությունը թույլ կտա կանխել ցանկացած անախորժություն: Մենք միշտ բաց ենք խոսում այս թեմայի շուրջ ռուսական կողմի հետ», – ասել է Մամեդյարովը «Իզվեստիա» պարբերականի հետ զրույցում:
