Ինչպես հայտնի է, Սահմանադրական դատարանը որոշել է վարույթ չընդունել ՍԴ նախագահ Հրայր Թովմասյանի լիազորությունները դադարեցնելու մասին ԱԺ որոշման նախագիծը: Թեման քննարկելու համար «Առաջին լրատվական»-ը հյուրընկալել է ԱԺ «Իմ քայլը» խմբակցության պատգամավոր Սուրեն Գրիգորյանին:
Մեր զրուցակիցը տեսականորեն սպասելի էր համարում ՍԴ այս որոշումը, սակայն բովանդակային առումով նրա համար որոշումն անսպասելի էր. «Ես ավելի շատ ակնկալում էի, որ գործը կընդունվի քննության, և արդեն բովանդակային որոշում կկայացվի՝ կբավարարվի կամ կմերժվի»:
Սուրեն Գրիգորյանը չի շտապում ՍԴ այս որոշմանը գնահատական տալ. «Քանի դեռ որոշումը հրապարակված չէ, դրա հիմնավոր կամ անհիմն լինելու վերաբերյալ դատողություններից ես, որպես իրավաբան, զերծ կմնայի»:
Նրա կարծիքով՝ քանի որ ՍԴ որոշումները հնարավոր չէ բողոքարկել, այդ առումով այս որոշումը աներկբա է, սակայն բովանդակային առումով չի կարելի գնահատական տալ մինչև ընթերցումը:
Դիտարկմանը՝ օրենսդիրը ամեն ինչ փորձում է իրականացնել իրավունքի, օրինականության և էթիկայի սահմաններում, մինչդեռ հակառակ կողմը խաղում է այլ դաշտում և օրենսդրին, այսպես ասած, հաղթում է. տեղեկություններ կան, որ Քոչարյանի դատապաշտպան Արամ Օրբելյանը բազմիցս այցելել է ՍԴ նախագահին, որի ելումուտը, Հրայր Թովմասյանի հանձնարարականով, չի արձանագրվել, Սուրեն Գրիգորյանը հակադարձեց. «Ես խնդիր չեմ տեսնում, որ սանիկը իր քավորին կարող է պարբերաբար տեսնել»:
