Գյումրիի Ժուռնալիստների «Ասպարեզ» ակումբի խորհրդի նախագահ Լևոն Բարսեղյանի համար վարչապետի նշանակման հարցը հանրապետությունում ամենակտուալը չէ, քանի որ պետության զավթման ռեժիմում բնավ կարևոր չէ, թե ով է գլխավոր գործակատար աշխատում Սերժ Սարգսյանի մոտ:
«Նախ՝ տարօրինակ է այն, որ Սերժ Սարգսյանը հրաժարականի դիմումը մեկ ամսից ավելի իր առաջ ունենալով՝ մինչև հիմա չի մտածել, թե ով պետք է լինի վարչապետը, կամ ինչ-որ մանկական խաղերի մեջ է, հայտարարում է, որ լինելու է հանրության կողմից միանշանակ ընդունված մարդ և այլն: Երբ հրաժարականն ընդունում ես, կարող ես 15 րոպե հետո նշանակել հաջորդին: Թե ինչու է թողնված լայն հասարակական քննարկման. կարելի է կռահել, որ ինչ-ինչ թեմաներից հանրությանը շեղելու համար է. ինչքան ուշացնի, այնքան շատ կենացները կթանկական: Գուցե նաև քողարկված տենդեր է հայտարարված»,- ասաց Լևոն Բարսեղյանը:
Նա նշեց, որ անուններից, որոնք շրջանառվում են վարչապետի պաշտոնում, որն էլ լինի, քրեաօլիգարխիկ համակարգի սպասարկու կամ ծառայող պետք է լինի, մի քիչ բեջուրա կամ պակաս բեջուրա, ի՞նչ տարբերություն՝ Հովիկ Աբրահամյա՞նն է, թե՞ Արթուր Բաղդասարյանը: Նրանց մեջ սկզբունքային որևէ տարբերություն չկա, նաև ակնկալիքներ չկան, և որևէ մեկն ակնկալիք չունի:
Հասարակությունը որքանո՞վ կարող է դիմադրողականություն ցուցաբերել հարցին: Լևոն Բարսեղյանը այս առթիվ ցավով նկատեց, որ հասարակության դիմադրողականությունը բավականին թուլացած է, բազմաթիվ քաղաքական, սոցիալական հիվանդություններից թեև անցել է, բայց թույլ է դուրս եկել, թեև սա չի նշանակում, որ ինչ-որ սրացման ժամանակ ուժերի ակումուլյացիա տեղի չի ունենա:
«Քրեաօլիգարխիկ ռեժիմը պետության զավթման ինչ-որ ֆիգուրներ է շարժում, փոխատեղում, հասարակության մի շերտն էլ ասել է՝ աման, տեսնեմ ի՞նչ լավ բան է լինելու, կամ ի՞նչ վատ բան է լինելու, բայց նույն աղտեղությունններն են լինելու, մինչև ռեժիմը չփոխվի»,- ասաց նա:
Սովետական միությունում, նրա խոսքով, կոմկուսի գլխավոր քարտուղարի մահվան ժամանակ թաղման հանձնաժողով էր կազմվում, և ով լինում էր հանձնաժողովի նախագահ, նա էլ դառնալու էր հաջորդ գլխավոր քարտուղարը: Նրա դիտարկմամբ՝ հնարավոր է, որ այսպիսի սցենարով լինի հերթական վարչապետը Սերժ Սարգսյանի ձեռքով:
«Վարչապետերի դեգրադացիա է տեղի ունենում: Հնարավոր թեկնածուների մեջ մեկին չգիտեմ, որ իր կարողություններով ավելին լիներ, քան նախորդը: Նախորդն էլ մի բանի պետք չէ, նա էլ օֆշորային այլանդակությունների մեջ էր… Կարող է՝ ծիրանի գործը մի քիչ զարգանա»,- ծիծաղելով ասաց Լևոն Բարսեղյանը:
Հարցազրույցն ամբողջությամբ՝ տեսանյութում:
