ԵՄ-ին և ՆԱՏՕ-ին անդամագրվելը «Վրաստանի գլխավոր առաջնահերթություններից է», ասել է Վրաստանի՝ եվրոպական ու եվրաատլանտյան կառույցներին ինտեգրման հարցերով պետնախարար Ալեքսի Պետրիաշվիլին, հայտնում է ITAR-TASS-ը: Թբիլիսիում մեկնարկած «ճանապարհ դեպի ՆԱՏՕ. Կենտրոնական և Արևելյան Եվրոպայի երկրների փորձը» միջազգային համաժողովում ելույթ ունենալով՝ նա ասել է, որ «եվրաատլանտյան կառույցներին ինտեգրվելու կուրսը, ԵՄ և ՆԱՏՕ-ի անդամ դառնալու ձգտումը Վրաստանի որևէ քաղաքական ուժի բացառիկ գաղափարը չէ, դա երկրի բնակչության ճնշող մեծամասնության և երկրի հասարակական-քաղաքական ուժերի կամքն է»:
Թբիլիսիում ՆԱՏՕ-ի շաբաթի շրջանակներում տեղի ունեցած կոնֆերանսին մասնակցում են ՆԱՏՕ-ի գլխավոր քարտուղարի՝ ժողովրդական դիվանագիտության հարցերով տեղակալ Կոլինդա Գրաբար-Կիտարովիչը, Լիտվայի, Էստոնիայի կառավարությունների ներկայացուցիչները, Վրաստանի ԱԳՆ և ՊՆ ղեկավարները, ՆԱՏՕ-ի անդամ եվրոպական երկրների՝ Թբիլիսիում հավատարմագրված դեսպաններ, Բուլղարիայի նախկին ԱԳ նախարար Սողոմոն Պասին:
Միևնույն ժամանակ, վրացի մի շարք քաղաքական գործիչներ և ընդդիմադիր կուսակցությունների մի մասը դեմ է արտահայտվում ՆԱՏՕ-ի կազմում Վրաստանի ընդգրկվելուն և կողմ է «որևէ ռազմական դաշինքի չմիանալու քաղաքականությանը»՝ հայտարարելով, որ «դաշինքին անդամակցության կուրսից հրաժարվելը հնարավորություն կտա լիովին նորմալացնել ՌԴ-ի հետ հարաբերությունները և սկսել Վրաստանի խաղաղ միավորման գործընթացը»:
Ընդդիմադիր կուսակցությունների և կառավարության մյուս մասը կողմ է ՆԱՏՕ-ի կազմ մտնելուն՝ նշելով, որ «դաշինքի կազմ մտնելու գործընթացը կարելի է համատեղել ՌԴ-ի հետ Վրաստանի հարաբերությունների նորմալացման հետ»:
