«Հույսներդ հույսի վրա չդնեք». «Դ!եմ եմ»-ը կոչ է անում շարունակել պայքարը

Սահմանադրական դատարանը Կենսաթոշակային պարտադիր կուտակային համակարգի օրենքի վերաբերյալ որոշմամբ տվել է այն գնահատականը, որ ցանկանում էին «Դ!եմ եմ» նախաձեռնության անդամները: Ապրիլի 5-ին լրագրողների հետ հանդիպմանը նախաձեռնության անդամ, քաղաքագետ Դավիթ Մանուկյանը նշեց, որ խնդրահարույց է ոչ թե որոշումը, այլ դրա տարաբնույթ, հաճախ ապակողմնորոշող մեկնաբանությունները:

«Ուշագրավ է մի բան. բոլոր այս ապակողմնորոշող մեկնաբանությունները հիմնվում են ՍԴ որոշման եզրափակիչ մասի 7-րդ կետի վրա` տարաժամկետել մինչև սեպտեմբերի 30: Մի բան է` սեպտեմբերի 30-ն ընկալել որպես հնարավորություն ամեն գնով մինչ այդ գումարներ կորզել հակասահմանադրական ճանապարհով, մեկ այլ բան է` այն ընդունել որպես այն մաքսիմալ, ամենաուշ ժամկետը, մինչև երբ պարտավոր են օրենքը փոփոխել, լրամշակել, որ այն հարմարեցվի Սահմանադրությանը, ժողովրդի կամքին, անտրամաբանական է այն ընկալել որպես գումար կորզելու միջոց»,- ասաց նա` հավելելով, որ ՍԴ որոշումից ելնելով հարկավոր է օր առաջ կատարել համապատասխան շտկումներն այդ օրենքում:

Նախաձեռնության անդամ Հակոբ Արշակյանի խոսքով` բոլոր նրանք, ում նկատմամբ ցանկանում են կիրառել այս օրենքը, ազատ են ընտրություն կատարելու: «Հաշվի առնելով, որ 5.000-ից փոքր-ինչ ավելի մարդ է ընտրել ֆոնդեր, նշանակում է, որ 97 տոկոսը չեն ընտրել, չեն ցանկացել մասնակցել օրենքի կիրառմանը, սա առաջին հերթին կոչ է իշխանություններին. պետք է չեղարկել այս օրենքը, անցնել նախորդ համակարգին, վերադարձնել գումարները»,- ասաց նա:

Արշակյանը նշեց` երբ փորձում են ներկայացնել, թե վերադարձը հին համակարգին դժվար է անել, դա ճիշտ չէ: Մանուկյանն էլ հավելեց, որ պատասխանատվություն են պահանջում` որտեղ է եղել Արդարադատության նախարարության իրավական փորձաքննություն իրականացնող բաժինը, որ նման թափթփված, փնթի, հակասահմանադրական օրենքը հասել է ԱԺ, նախագահն էլ ստորագրել է: Նախաձեռնությունը պատրաստել է դիմումի ձևանմուշներ. դրանցից մեկը քաղաքացիները պիտի տան Կենտրոնական բանկ, Ֆինանսների նախարարություն, կենտրոնական դեպոզիտարիա` նշելով, որ թույլ չեն տալիս, որ իրենց փոխարեն ֆոնդ ընտրվի, և դիմում` գործատուին, որով թույլ չեն տալիս պահումներ կատարել:

Նախաձեռնության ներկայացուցիչ Դավիթ Դավթյանը խորհուրդ տվեց «հույսները հույսի վրա չդնել»: «Շատ կարևոր է, որ դուրս գան, պայքարեն էն մարդիկ, ում ստիպել են ֆոնդեր ընտրել, ամսի 12-ի մեր հանրահավաքին նաև էդ մարդկանց ներկայությունը շատ լավ կլինի` հետագա պայքարը ճիշտ ուղղությամբ տանելու համար»,- ասաց նա: Մանուկյանն էլ հավելեց, որ իրավունքների ոտնահարման հանդեպ երբեք չի կարելի հանդուրժող լինել: Լրագրողների հարցին ի պատասխան` նա նշեց, որ կառավարության մաս դառնալու առաջարկ չի եղել, եթե լինի, կքննարկեն, բայց չի պատկերացնում` ինչպես պիտի մաս կազմեն, եթե քաղաքացիական նախաձեռնություն են:

Լուսանկարը՝ Hetq.am-ի