ԱՄՆ նախագահ Դոնալդ Թրամփը հայտնել է, որ իր հեռախոսազրույցը արտասահմանյան առաջնորդներից մեկի հետ, որի պատճառով ԱՄՆ անանուն հետախուզության աշխատակիցը իր դեմ բողոք է ներկայացրել, «բացարձակապես կատարյալ էր»: Այս մասին ԱՄՆ նախագահը գրել է Twitter-ում:
Մասնավորապես, նա հայտարարել է, որ դեմոկրատները և նրանց աջակցող լրատվամիջոցները պնդում են, որ ԱՄՆ նախագահը «վտանգավոր» զրույց է ունեցել ոմն արտասահմանյան առաջնորդի հետ, բայց միևնույն ժամանակ նրանք ապավինում են «ծայրահեղ կողմնակալ» տեղեկատուի հայտարարություններին:
Ավելի վաղ ԱՄՆ նախագահի փաստաբան Ռուդոլֆ Ջուլիանին CNN հեռուստաընկերության եթերում հայտարարել էր, որ ԱՄՆ-ի հետախուզության անանուն աշխատակիցը կարող էր բողոք ներկայացնել հետախուզական ծառայությունների գլխավոր տեսուչ Մայքլ Աթքինսոնին՝ Թրամփի և Ուկրաինայի նախագահ Վլադիմիր Զելենսկիի միջև հեռախոսազրույցի պատճառով: Դրանից առաջ Washington Post պարբերականը հաղորդել էր, որ հետախույզին անհանգստացրել է Թրամփի անխոհեմ արտահայտությունը, որը վերաբերում էր Ուկրաինային և շոշափել է ԱՄՆ-ի ազգային շահերը:
Ինքը՝ Թրամփը, հինգշաբթի օրը հերքել է լրատվամիջոցների այն պնդումները, որ ինքը կարող էր արտասահմանյան առաջնորդներից մեկի հետ զրույցի ընթացքում տալ խոստում, որը կվնասեր ԱՄՆ շահերին: