Սահմանադրական դատարանի նախագահ Գագիկ Հարությունյանը կարծում է՝ Կուտակային կենսաթոշակային համակարգի հայցադիմումի քննության արդյունքում ՍԴ կայացրած որոշման մեջ յուրաքանչյուրը տեսնում է այն, ինչ ինքն է ցանկանում: Հանրային հեռուստաընկերության եթերում Հարությունյանը որպես ՍԴ որոշման տարատեսակ մեկնաբանությունների պատճառ մատնանշեց՝ իրավագիտակցության մակարդակը, այն, որ յուրաքանչյուրը որոշման մեջ տեսնում է իր ցանկացածը, ու այն, որ չսպասեցին ՍԴ որոշման ստորագրմանը. այն, ի դեպ, կայքում կտեղադրվի վաղը. ՍԴ նախագահը միայն այսօր է ստորագրել:
«ՍԴ որոշումը՝ մինչև սեպտեմբերի 30-ը օրենքի տարժամկետման մասին, եզակի երևույթ չէ, աշխարհում կիրառվող պրակտիկա է, օրենքը թույլ է տալիս ՍԴ-ին կիրառել նման նորմ, ինչից էլ մենք օգտվել ենք: Ես անձամբ եմ հետևելու որոշման կտարմանը: Մեզ պետք են վստահության ամուր հիմքեր, իսկ այն հիմքերը, որ դրված են օրենքի հիմքում, խախուտ են նրանով, որ թոշակների ինդեքսավորման հարցը թողած է պարզապես կառավարության վրա»,- ասաց նա:
Մինչև սեպտեմբեր աշխատող խումբը պետք է որոշի, թե ՍԴ-ն ինչու է հակասահմանադրական ճանաչել օրենքի որոշ նորմեր, իսկ սեպտեմբերի 30-ից հետո, եթե համարժեք փոփոխություններ չարեցին, որոշակի քաոտիկ վիճակ կառաջանա: «Մենք չենք զլանա և չենք սպասի մինչև տարեվերջ, այլ հոկտեմբերին արտահերթ արդյունքների ամփոփում կանենք և կհայտարարենք, թե ինչ վիճակ է»,- ասաց նա:
