Սաուդյան Արաբիայի Saudi Aramco ազգային նավթային ընկերության գործարաններն անօդաչու սարքերի կողմից հարձակման ենթարկվելուց հետո վերլուծաբանները գների աճ են կանխատեսում նավթի բարելի դիմաց 5-10 դոլարով սեպտեմբերի 16-ին կայանալիք առևտրի ժամանակ:
Նման կարծիք են հայտնել Reuters-ի կողմից հարցված բորսային առևտրականներն ու վերլուծաբանները:
Այն դեպքում, եթե Սաուդյան Արաբիան չկարողանա արագ վերականգնել նավթի մատակարարումները, երկարաժամկետ հեռանկարում գները կարող են բարձրանալ մեկ բարելի դիմաց 100 դոլարի, նշել են նրանք:
Նավթի համաշխարհային գները առևտրի ավարտին՝ սեպտեմբերի 13-ին, բացասական միտում են ունեցել՝ մեկ բարելի դիմաց 54.85 դոլար:
Եվրոպայում նավթը նույնպես էժանացել է: Լոնդոնում միջմայրցամաքային բորսայում այն հասել է 60.22 դոլարի՝ մեկ բարելի դիմաց:
Սեպտեմբերի 14-ի գիշերը անօդաչուները հարձակվել էին աշխարհի խոշորագույն նավթավերամշակման համալիրի վրա, որը գտնվում է Սաուդյան Արաբիայի արևելքում: Դա հանգեցրել է Սաուդյան Արաբիայում նավթի արդյունահանման կրկնակի՝ օրական 5.7 միլիոն բարելով կրճատման: Վերականգնումը կարող է տևել մի քանի շաբաթ:
