Ինչ է աէրոֆոբիան, կամ պարզապես թռիչքից վախը՝ շատերին է հայտնի: Վերջերս նոր տերմին է հայտնվել օդային ճանապարհորդության բառապաշարում՝ flight-shaming: Այն ծագում է շվեդական flygskam-ից և օգտագործվում է այն մարդկանց համար, ովքեր մտահոգված են շրջակա միջավայրով և կոչ են անում կրճատել թռիչքների քանակը կամ նույնիսկ հրաժարվել դրանցից՝ CO2- ի արտանետումները նվազեցնելու նպատակով:
Շարժման ամենավառ ներկայացուցիչներից մեկը՝ 16-ամյա շվեդ էկո-ակտիվիստ Գրետա Թյունբերգը, նույնիսկ օգոստոսի վերջին էլեկտրական զբոսանավով է անցել Ատլանտիկան՝ մասնակցելու Նյու Յորքում կլիմայի փոփոխության հարցով ՄԱԿ-ի գագաթնաժողովին: Նա հրաժարվել է ինքնաթիռով թռչել Միացյալ Նահանգներ ՝ այն վնասների պատճառով, որոնք օդային ճանապարհորդությունը պատճառում է շրջակա միջավայրին:
Ինչպես ցույց է տվել Ipsos-ի վերջին միջազգային ուսումնասիրությունը, Գրետայի տեսակետները, չնայած ոչ այդքան ծայրահեղ ձևով, կիսում է յուրաքանչյուր յոթ հարցվածներից մեկը: Ընդհանուր առմամբ, հարցումներին մասնակցել են ավելի քան 19 հազար մեծահասակներ 27 երկրներից: Նրանց 14%-ը նշել է, որ հնարավորության դեպքում համաձայն կլինեն ընտրել տեղաշարժման համար ավելի քիչ հարմարավետ միջոց, քան ինքնաթիռները` CO2- ի արտանետումները նվազեցնելու համար: Ավելին, նրանք պատրաստ են ավելի շատ վճարել տոմսի համար: Երկու անգամ ավելի շատ հարցվածներ (29%) համաձայն են հրաժարվել ինքնաթիռից, եթե գտնվի փոխարինող միջոց, որը ինքնաթիռին նման կլինի ինքնարժեքով կամ հարմարավետությամբ:
Միևնույն ժամանակ, հարցվածների քառորդ մասը խոստովանել է, որ տրանսպորտային միջոց ընտրելիս իրենք ընդհանրապես չեն մտածում շրջակա միջավայրի վրա դրա ազդեցության մասին:
