«Հարցը պետք է դիտարկել հետևյալ տեսանկյունից՝ Սահմանադրական դատարանը լեգիտիմություն ունի՞, թե՞ ոչ։ Իմ խորին համոզմամբ՝ չունի»,- «Առաջին լրատվական»-ի հետ զրույցում ասաց քաղաքագետ Լևոն Շիրինյանը՝ անդրադառնալով Ռոբերտ Քոչարյանի հետ կապված Սահմանադրական դատարանի որոշմանը։
Շարունակելով՝ քաղաքագետը նշեց. «Հիմա ի՞նչ են անելու իշխանությունները, ազատ են թողնելու, որ գնա տո՞ւն, բա ինչպես են երկրի կայունությունն ապահովելու։ Ես ենթադրում էի, որ այդքան հեռուն չէին գնա, բայց առաջին անգամ սխալվեցի։ Դա ոչ լեգիտիմ դատարան է, նույնիսկ իրենք չեն կարողանում որոշել՝ անդա՞մ են, թե՞ դատավոր, ինչպե՞ս կարող է այդ դատարանը լեգիտիմ որոշում կայացնել։ Հանրային ընկալման մեջ այդ դատարանը մերժված է, ճիշտ այնպես, ինչպես Սերժ Սարգսյանը։ Ես մի բան կարող եմ ասել՝ այդ որոշման իրավական լեգիտիմությունը հիմնազուրկ է, մնացածը իշխանությունը թող մտածի»։
Միևնույն ժամանակ, Լևոն Շիրինյանն անհասկանալի է համարում իշխանության մինչ այժմ արված քայլերը. «Չենք հասկանում՝ ինչ խաղեր են տալիս, ինչու բերեցին հասցրին այս օրվան, ինչո՞ւ թողեցին ոտքի կանգնեն։ Պետության ինստիտուցիոնալ հիմքերը քայքայելու ջանքեր են գործադրվում, իսկ իշխանությունները ձեռքները ծալած նստած էին»։
Քաղաքագետի դիտարկմամբ՝ ժողովրդի գիտակցության մեջ արդարադատություն այլևս գոյություն չունի. «Եթե մարդը հանցանք է գործում՝ ինչո՞ւ է թաքնվում անձեռնմխելիության տակ։ Արձանագրենք, որ Հայաստանը դատական համակարգ չունի։ Սերժի ռեժիմի ժամանակ այդ դատարանները զբաղված էին թղթեր վավերացնելով, հիմա էլ, ըստ էության, ապստամբեցին նոր իրականության դեմ։ Քաղաքացու տեսակետից նայեք՝ հեղափոխությունը չի կայանում, անդամալույծ վիճակ է։ Սա իշխանության մեղավորությունն է, ի՞նչ դատական խաղերի մեջ էին։ Պարզ չէ՞ր, որ նախկին ռեժիմը գրոհի է դիմելու, ինչո՞ւ բոլոր սցենարները չունեին»։
Շիրինյանի խոսքերով՝ սա իրենց փրկելու վերջին շանսն էր, որից և օգտվեցին։ «Իսկ ո՞վ է շահում այս վիճակից, պետությունը նորից հետ է մղվում, փաստորեն հեղափոխություն, սուվերեն կամք գոյություն չունի։ Հասարակությանը մատերի վրա խաղացնում են։ Կրկնում եմ՝ սա իշխանության մեղքն է, ինչո՞ւ այս ձգեցին ու թողեցին, որ կազմակերպվեն։ Դե հիմա թող գնան ու մտածեն, թե ինչ պետք է անեն»,-եզրափակեց նա։
Լուսանկարը՝ Armeniasputnik-ի