Իրավական ակտերի, նախագծերի հրապարակման միասնական կայքում ներկայացվել է Հայաստանի Հանարապետության դատական և իրավական բարեփոխումների 2019-2023թթ. ռազմավարությունը և դրանից բխող գործողությունների ծրագրերը հաստատելու մասին կառավարության որոշման նախագիծը: Այսպիսով՝ Հայաստանում նոր-նոր տրվում է անցումային արդարադատությանը վերաբերող օրենսդրության հանրային, փորձագիտական քննարկումների մեկնարկը: Հավանաբար ոչ պատահական զուգադիպությամբ երեկ լայնածավալ խուզարկություններ են կատարվել ֆինանսների նախկին նախարար Գագիկ Խաչատրյանի և նրա հետ փոխկապակցված անձանց բնակարաններում, տարածքներում:
Թեմայի շուրջ «Առաջին լրատվական»-ի հետ քննարկմանը մասնակցեցին Գերագույն խորհրդի նախկին պատգամավոր Ազատ Արշակյանը, ԱԺ «Իմ քայլը» խմբակցության պագամավոր Վիկտոր Ենգիբարյանը և վերլուծաբան Գոռ Մադոյանը:
«Գագիկ Խաչատրյանի ձերբակալությունը հակակոռուպցիոն պայքարի դրվագներից մեկն էր: Երկրի կառավարող համակարգին օրինականության և օրինապահության դաշտ հրավիրելու ակցիա էր դա: Շատ կարևոր է գողոնը պետությանը վերադարձնելը, իսկ ընդհանրապես դա կանխարգելիչ քայլ է: Պետական ծառայողը եթե չարաշահել է իր պաշտոնեական դիրքը, նա պետք է պատժվի,- ընդգծեց Ազատ Արշակյանը:
«Քննչական մարմիններն իրականացրել են գործընթաց, որպեսզի բավարար հիմքեր ունենան Գ. Խաչատրյանին կալանքի ենթարկելու համար, և տեխնիկապես հիմա է հասունացել պահը, որ ԱԱԾ-ն մեղադրանք առաջադրի: Գործ ունենք մի մարդու հետ, որն իր ամբողջ գործունեության ընթացքում եղել է պետական պաշտոնյա, գործ ունենք մեծահարուստ մուլտիմիլիոների հետ»,- նշեց Վ. Ենգիբարյանը՝ հավելելով, որ այս ամենը վերագրելով Ամուլսարի թեմայից շեղելուն, պարզունակ մեկնաբանություն է: Պատգամավորի խոսքով՝ այսօր ապրում ենք մի ժամանակահատվածում, երբ չկա անպատժելիություն, և ձերբակալությունները չպետք է զարմանալի լինեն:
Գոռ Մադոյանի կարծիքով՝ ֆինանսների նախկին նախարարի ձերբակալությունը կարելի է դիտարկել հեղափոխության շարունակության համատեքստում. «Հասարակությանն ուղերձներ են հղվում այն մասին, որ հեղափոխությունը կանգ չի առել»:
Մանրամասն՝ տեսանյութում:
