Եվրոպա լիգայի որակավորման երրորդ փուլի առաջին խաղում «Արարատ-Արմենիան» Երևանում ձախողվեց՝ 1:2 հաշվով զիջելով Վրաստանի չեմպիոն «Սաբուրթալոյին»: Առաջին կեսում մեր թիմը առջևում էր, և բոլորս մտածում էինք համոզիչ հաշվով վերջնական հաղթանակի մասին: Առաջին կեսում տպավորությունն այնպիսին էր, որ «Արարատ-Արմենիան» կարգով գերազանցում է մրցակցին: Մոտ 20-25 րոպե «Սաբուրթալոն» չէր կարողանում մոտենալ մեր տուգանային հրապարակին, իսկ «Արարատ-Արմենիան» մեկը մյուսի հետևից վտանգավոր պահեր էր ստեղծում: Ի՞նչ տեղի ունեցավ ընդմիջմանը: Երկրորդ կեսում «Արարատ-Արմենիան», բառի բուն իմաստով, տապալվեց՝ պատասխան մրցավեճից առաջ հայտնվելով բավական ծանր իրավիճակում:
Հենց հանդիպման սկզբից «Արարատ-Արմենիան» մրցակցին փորձում էր ճնշել երկար փոխանցումներով և եզրային ճեղքումներով: Կարելի է ասել, որ մարտավարությունն առաջին կեսում աշխատեց: «Սաբուրթալոյի» համար, ըստ էության, անսպասելի էր «Արարատ-Արմենիայի» այս տակտիկան: Հանդիպման առաջին րոպեներից «Սաբուրթալոն» տեխնիկապես գրագետ թիմի տպավորություն թողեց: Այո «Արարատ-Արմենիայի» ատլետիկ տվյալներով տղաները որոշ ժամանակ ճնշեցին մրցակցին, բայց․․․ Երկրորդ կեսում «Սաբուրթալոյի» գլխավոր մարզիչը ուղղակի մանկական մատ արեց «Արարատ-Արմենիային» և, մասնավորապես, մարզչական շտաբին: Իսկ երկրորդ կեսում «Սաբուրթալոյի» գլխավոր մարզիչ Գեորգի Չիաբրիշվիլին իր ֆուտբոլիստներին հրահանգեց ուժեղացնել խաղի տեպմը և պրեսինգ կիրառել: Վրացի ֆուտբոլիտսները կարճ և արագ փոխանցումներով ուղղակի չեզոքացրին «Արարատ-Արմենիայի» ֆիզիկապես ամուր, բարձրահասակ և ինչ-որ տեղ «դանդալոշ» լեգեոներներին: «Արարատ-Արմենիայի» գլխավոր մարզիչ Վարդան Մինասյանը այդպես էլ հակախաղ չգտավ վրացական թիմի դեմ:
Ի դեպ, սա առաջին դեպքը չէ, երբ «Արարատ-Արմենիան» անց է կացնում երկու բոլորովին տարբեր խաղակեսեր: Չեմպիոնների լիգայի խաղարկության որակավորման առաջին փուլի առաջին խաղում «Արարատ-Արմենիան» շվեդական ԱԻԿ-ի հետ հաջող առաջին կես անցկացնելուց հետո երկրորդ խաղակեսում ոչնչով աչքի չընկավ: Եվ սա այն դեպքում, երբ մրցակիցը խաղում էր 10 ֆուտբոլիստով, և մենք առջևում էինք 2:1 հաշվով: Չափազանց անհաջող երկրորդ խաղակես անցկացրինք նաև ԱԻԿ-ի հետ պատասխան խաղում: Չեմպիոնների լիգայի խաղարկության որակավորման երկրորդ փուլի առաջին խաղում «Արարատ-Արմենիան» անատամ երկրորդ կես անցկացրեց արդեն 10 հոգով մնացած Ջիբրալթարի «Լինկոլն» կիսապրոֆեսիոնալ թիմի հետ:
Ի՞նչ է սա նշանակում: «Արարատ-Արմենիան» խաղակեսի թիմ է, որի մարտավարությունը կարդալով՝ մրցակիցը չեզոքացնում է սպառնալիքը և նույնիսկ առավելության հասնում: Տեղի ունեցած հանդիպումները ցույց տվեցին, որ Վարդան Մինասյանը, ընտրելով ճիշտ մարտավարություն, այնուամենայնիվ, չունի պլան Բ, կամ այն պարզապես չի աշխատում:
Այսօր շատերը խոսում են, որ երեկ «Սաբուրթալոն» հաջողության հասավ մերոնց կոնցենտրացիայի թուլանալու և կոպիտ սխալների հետևանքով: Բնավ ոչ, «Սաբուրթալոն» երեկ օբյեկտիվորեն շատ ավելի ուժեղ էր: Պարզագույն օրինակ. վրացական թիմի՝ գնդակը պահելը և սեփական կիսադաշտից դուրս գալը հիացմունք էր առաջացնում: «Արարատ-Արմենիայի» ֆուտբոլիստները սեփական կիսադաշտում տառապում էին գնդակով և մեծ դժվարությամբ էին տեղաշարժվում: Ավելին՝ մերոնք մի քանի անգամ սեփական կիսադաշտում գնդակն ուղղակի նվիրեցին մրցակցին:
Կարևոր մի փաստ. ի տարբերություն «Արարատ-Արմենիայի»՝ «Սաբուրթալոյում» խաղում էին 80 տոկոսով տեղացի ֆուտբոլիստներ: Մի քանի առաջատար ֆուտբոլիստներ էլ վերջերս հեռացել էին վրացական թիմից: Հարևան երկրի չեմպիոնի տեղացի ֆուտբոլիստների ցուցադրած ֆուտբոլը բարի նախանձ էր առաջացնում: «Արարատ-Արմենիայի» կազմում երեկ հիմնական կազմում տեղ էին գտել միայն երկու հայ ֆուտբոլիստներ՝ Պետրոս Ավետիսյանը և Գոռ Մալաքյանը, որոնք ոչնչով աչքի չընկան և փոխարինվեցին:
«Այն, ինչ սպասում էինք մրցակցից, տեսանք: Պարզապես երկրորդ կեսում չստացվեց մեզ մոտ: Ինչ վերաբերում է «Սաբուրթալոյին», ապա ամենևին էլ մեզ չզարմացրին: Խաղակցվածության առումով ավելի բարձր թիմ է: Մենք կայանալու խնդիր ունենք: Չես կարող բերել 5 նոր ֆուտբոլիստ ու միանգամից պահանջել, որ հարմարվեն թիմին: Անհատապես ու դրվագներում կարող են լավ խաղալ, սակայն ժամանակ է պետք ամբողջովին հարմարվելու համար։ Սպասում էի, որ երկրորդ խաղակեսում խնդիրներ ունենալու ենք: Ցանկալի կլիներ, որ երկրորդ գոլը խփեինք»,- խաղից հետո ասել է Վարդան Մինասյանը:
Ասել, որ Վրաստանի չեմպիոնը Երևանում վճռեց դիմակայության ելքը՝ կարծում ենք, ճիշտ չի լինի: Եկող շաբաթ կողմերը կհանդիպեն Թբիլիսիում: «Արարատ-Արմենիան» թեկուզ փոքր, բայց այուամենայնիվ ունի հնարավորություն՝ մրցակցի արգելքը հաղթահարելու: Հուսանք, որ մեկ շաբաթ անց մեր չեմպիոնին կհաջողվի ետ բերել կորցրածը և շարունակել պայքարը Եվրոպա լիգայում:
