ԵԱՀԿ Մինսկի խմբի ամերիկացի համանախագահ Ջեյմս Ուորլիքը երեկ թվիթերյան իր միկրոբլոգում գրառում է կատարել, որ Սերժ Սարգսյանն ու Իլհամ Ալիևը համաձայնել են հանդիպման, և հանդիպման ժամկետները ճշտվում են: Անհասկանալի է, թե արդյոք Ուորլիքի խոսքը վերաբերում է Հաագայում միջուկային գագաթնաժողովի՞ ընթացքում տեղի ունենալիք հանդիպմանը՝ ինչպես պլանավորվում էր վերջին օրերին, թե՞ Սարգսյան-Ալիև հանդիպումը տեղի կունենա այլ ժամկետներում: Այսինքն` չի բացառվում, որ Սարգսյան-Ալիև հանդիպումը տեղի ունենա այսօր Հաագայում, և գուցե դա ոչ միայն չի բացառվում, այլ շատ հավանական է, որ հենց այդպես էլ կլինի:
Մինչ այդ հերթական ողբերգական լուրն է ստացվել հայ-ադրբեջանական շփման գծից՝ այստեղ ղարաբաղա-ադրբեջանական շփման գծում մարտական հենակետում մարտական առաջադրանք կատարելիս մահացու վիրավորվել է հայաստանցի զինծառայողներից մեկը: Սա վերջին մի քանի օրերին երկրորդ նման դեպքն է:
Պատահակա՞ն են արդյոք այս դեպքերը Սարգսյան-Ալիև կազմակերպվող հանդիպման ֆոնին, թե՞ ոչ` շատ դժվար է ասել: Համենայնդեպս, մի բան պարզ է, որ խաղաղության և կայունության պահպանումը ղարաբաղյան հակամարտության գործընթացում ներկայումս չափազանց կարևոր խնդիր է, և համանախագահները անկասկած հենց այս կարևորությունը հաշվի առնելով են ձեռնամուխ եղել Սարգսյան-Ալիև հանդիպմանը:
Այս հանդիպման առանցքում անկասկած լինելու է երկու նախագահների հավաստիացումը առ այն, որ կողմերից որևէ մեկը չի փորձի քայլ կատարել Ղրիմում ստեղծված իրավիճակից, Ռուսաստանի մեկուսացման քաղաքականությունից և Արևմուտքի հետ լարվածությունից օգտվել կամ,- ինչը իհարկե ավելի հավանական է,- որևէ գործարքի մեջ մտնել հենց Ռուսաստանի հետ և ռազմական ավանտյուրա նախաձեռնել Լեռնային Ղարաբաղի ուղղությամբ:
Կհաջողվի՞ այս փորձը համանախագահների մոտ, թե՞ ոչ` կրկին շատ դժվար է ասել, որովհետև իրադարձությունները շատ արագ են զարգանում, և բավականին բարդ է կանխագուշակել, թե Սարգսյան-Ալիև հանդիպման, այսպես ասած, երաշխիքները ինչքան կայուն կլինեն և պիտանելիության ինչ ժամկետ կարող են ունենալ: Հատկապես այն զարգացումների ֆոնին, որոնք արձանագրվում են նաև Սիրիայում, որտեղ հանկարծ լարվածությունը բավական թեժ բռնկում է ունենում, ընդ որում` այն ուղղությամբ, որտեղ տեղակայված է ռուսական ռադիոտեղորոշիչ կայան, և որն էլ զուտ հայկական Քեսաբ բնակավայրն է, որն արդեն տարհանվել է գրոհի վտանգներից պաշտպանվելու համար:
