Նախագահ Արմեն Սարգսյանը ներքաղաքական իրողությունների առնչությամբ ուղերձ է հղել, որում շեշտադրում է երկխոսության, միասնականության կարևորությունը՝ ոչ միայն նպատակի, այլ նաև դրան հասնելու միջոցների կարևորությունը, նաև կարևոր համարում դադար առնելն ու անելիքը ծանրութեթև անելը: Արմեն Սարգսյանը նաև նշում է, որ իր սահմանադրական լիազորությունների շրջանակում է գործում՝ թերևս ակնարկելով, որ ավելին անել չի էլ կարող։
Քաղաքագետ Գագիկ Համբարյանի կարծիքով՝ նախագահ Արմեն Սարգսյանն այդ ուղերձը հղել է մի քանի պատճառով: «Երբ երկրի ներքաղաքական իրավիճակը լարվում է, շատ հասարակական-քաղաքական գործիչներ դիմում եմ նախագահ Արմեն Սարգսյանին։ Եթե նախագահ Արմեն Սարգսյանը չի արձագանքում, տեղի է ունենում նրա գործունեության խիստ քննադատում։ Հիշեցնեմ՝ նրան քննադատում էին դատարանների շենքի շրջափակման վերաբերյալ գնահատական չտալու համար, իսկ երբ նա այդ գնահատականը տվեց, քննադատությունները կրկնապատկվեցին։ Արմեն Սարգսյանին սկսեցին մեղադրել, ու մի մասը համարեց, որ լավ կլիներ, որ նախագահն ընդհանրապես կոչով հանդես չգար։ Հիմա իրավիճակը բավականին սրվել է դատարանների շուրջ՝ կոնկրետ Սահմանադրական դատարանի, ու նախագահը նորից կոչով է հանդես գալիս»,- «Առաջին լրատվական»-ի հետ զրույցում ասաց նա։
Համբարյանն ընդգծեց. «Քանի որ մենք խորհրդարանական հանրապետություն ենք, նախագահն այս ամենում որևէ ներգրավվածություն՝ բացի խորհրդակցական քննարկումներ անցկացնելուց, չի կարող ունենալ։ Երկրորդ ամենակարևոր հանգամանքը, թե ինչու է նախագահը մերթընդմերթ այսպիսի հայտարարություններով հանդես գալիս. պարոն Սարգսյանը փորձում է փակել այն բացը, որ կա Հայաստանի ներքաղաքական իրավիճակի շուրջ քննարկումներում։ Մենք տեսնում ենք, որ շատ դեպքերում հասարակությունը և քաղաքական ուժերը բացահայտ բևեռացված են՝ կա՛մ իշխանամետ են, կա՛մ ընդդիմադիր։ Որևէ մեկը հանդես չի գալիս կենտրոնական դիրքերից ու խաղաղարար առաքելություն չի իրականացնում։ Այդ բացը լրացնում է նախագահ Արմեն Սարգսյանը»։
Մեր այն դիտարկմանը, թե արդյոք այս ուղերձը կարո՞ղ ենք համարել աջակցություն իշխանություններին, Գագիկ Համբարյանը պատասխանեց. «Տարբեր կերպ կարող ենք մեկնաբանել։ Բայց նկատենք, որ պարոն Փաշինյանը շատ ծանր է տանում որոշ քաղաքական գործիչների ակտիվությունն ու հասարակության մեջ նրանց վարկանիշի բարձրացումը, ուստի ես չեմ կարծում, թե պարոն Փաշինյանին շատ դուր է գալիս պարոն Սարգսյանի ակտիվությունը»։
Համբարյանը հիշեցնում է՝ կոնկրետ Սահմանադրական դատարանի շուրջ տեղի ունեցող իրադարձություններում պարոն Փաշինյանն աջակցում է մեկին՝ Վահե Գրիգորյանին, ով Արմեն Սարգսյանին ոչ լեգիտիմ նախագահ է համարում. «Նա 1.5-2 տարի առաջ բոլորին համոզում էր, որ Արմեն Սարգսյանը չի կարող լինել ՀՀ նախագահ։ Դա պետք չէ մոռանալ, և ըստ իս՝ պարոն Սարգսյանը դա չի էլ մոռացել։ Չենք կարող կանխատեսել, թե քաղաքական դաշտում ինչ տեղի կունենա, եթե պարոն Փաշինյանը վերջնականապես իր ձեռքը վերցնի նաև Սահմանադրական դատարանը»։
