2013 թվականի հոկտեմբերի 30-ին, ժամը 17-ն անց 30 րոպեին Քաջարան քաղաքի իրենց բնակարանում ընտանեկան վիճաբանության ժամանակ 30-ամյա Լիանան (անունը փոխված է) խոհանոցային դանակով երկու անգամ հարվածել էր մոր մեջքին ու դեմքին, բռնուցքով հարվածներ էր հասցրել մոր աչքին ու քթին, կողերին ու մեջքին:
Տուժած մոր առողջությանը դստեր կողմից պատճառվել էր կյանքին վտանգ սպառնացող ծանր վնաս:
Այս ընտանեկան հանցագործության փաստով նոյեմբերի 9-ին Սյունիքի մարզի քննչական բաժնում քրեական գործ էր հարուցվել դիտավորությամբ տուժողի առողջությանը ծանր վնաս պատճառելու համար՝ ՀՀ քրեական օրենսգրքի 112 հոդվածի 1-ին մասով:
Նոյեմբերի 11-ին Լիանան ձերբակալվել էր, նոյեմբերի 13-ին ներգրավվել որպես մեղադրյալ, իսկ նոյեմբերի 14-ին նրա նկատմամբ որպես խափանման միջոց էր ընտրվել կալանավորումը:
Այս ամբողջ ընթացքում կասկածներ չէին առաջացել Լիանայի հոգեկան առողջության վերաբերյալ:
Նրան հարցաքննել էր քննիչը, կալանքի տակ առնելու որոշում կայացնելիս նրան տեսել էր դատավորը, բայց Լիանան, փաստորեն, ընկալվել էր որպես հոգեկան հիվանդություն չունեցող: Նա, որպես կալանավոր, տեղափոխվել էր կալանավայր:
Ցավալին այն է, որ Լիանայի հոգեկան խնդիրների մասին լռել են նաև նրա հարազատները: Ընտանիքը չի՞ իմացել, թե՞ չի ցանկացել բարձրաձայնել հիվանդության մասին՝ ավելի կարևորելով հասարակական կարծիքը: Հենց այդ պատճառով չէ՞, որ ընտանեկան դրաման հասունացել է մինչև մորը դանակով հարվածելու, կյանքին վտանգ սպառնացող վնաս պատճառելու աստիճան:
Լիանայի կենսագրականում նշված է նաև, որ նա… ամուսնացած է:
Միայն «Աբովյան» քրեակատարողական հիմնարկում են ուշադրություն դարձրել կալանավոր Լիանայի ոչ ադեկվատ վարքագծի վրա:
Կալանքի տակ գտնվող ամբաստանյալուհին հոգեբույժի կողմից ենթարկվել է զննման: Արդյունքում նրա մոտ նախնական ախտորոշվել է «Իրավիճակային խանգարում, դեպրեսիվ համախտանիշ»:
2013 թվականի դեկտեմբերի 17-ին, կատարված ծանր հանցանքից մոտ երկու ամիս անց վերջապես նշանակվել է դատահոգեբուժական և դատահոգեբանական համալիր փորձաքննություն, որի եզրակացության համաձայն՝ Լիանան տառապել ու տառապում է «Շիզոֆրենիա պարանոիդ ձև» հոգեկան հիվանդությամբ:
Ըստ մասնագիտական եզրակացության՝ մորը դանակահարելիս, բռունցքներով հարվածներ հասցնելիս Լիանան գտնվել է ցնորազառանցական ապրումների ազդեցության տակ, զրկված է եղել իր գործողությունների վտանգավորությունը գիտակցելու, դրանք ղեկավարելու հնարավորությունից:
Կատարած հանցավոր արարքի նկատմամբ Լիանան ճանաչվել է անմեղսունակ:
Մասնագիտական եզրակացությամբ՝ կալանավոր Լիանան վտանգ է ներկայացնում շրջապատի համար, կարիք ունի հսկողության, խնամքի և հարկադիր բուժման՝ ընդհանուր հսկողության հոգեբուժական բաժանմունքի պայմաններում:
Այդ վիճակում գտնվող անձին կալանավայր ուղարկելով՝ վտանգի էին ենթարկվել, փաստորեն, նույն քրեակատարողական հիմնարկում արգելանքի տակ գտնվող կանայք:
2014 թվականի փետրվարի 15-ին Սյունիքի մարզի ընդհանուր իրավասության դատարանը որոշում է կայացրել քրեական օրենքով չթույլատրված արարք կատարած այս հիվանդ կնոջ նկատմամբ անվտանգության միջոց կիրառված՝ հոգեբուժական հիվանդանոցում տեղավորելու որոշումը հաստատելու մասին:
Մարտի 17-ին դատարանը որոշել է անմեղսունակ անձին՝ Լիանային ազատել քրեական պատասխանատվությունից ու պատժից, նրա նկատմամբ ընդհանուր հսկողության հոգեբուժական բաժանմունքում նշանակել հարկադիր բուժում: