Կոտայքի մարզի ընդհանուր իրավասության դատարանում Մխիթար Պապոյանի նախագահությամբ սկսվում է Աշոտ Խաչատրյանի գործի դատական քննությունը:
Ըստ մեղադրանքի՝ Հրազդան քաղաքի 27-ամյա բնակիչ Աշոտ Խաչատրյանը, քրոջ նախկին ամուսնու՝ Նվեր Աբելյանի հետ գտնվելով լարված հարաբերությունների մեջ, 2013 թվականի հուլիսի 30-ին, ժամը 11-ն անց 40-ի սահմաններում վերջինիս պատահաբար հանդիպել է Հրազդան քաղաքի Միկրոշրջան թաղամասում:
Վրեժխնդիր լինելու նպատակով Խաչատրյանն իր անձնական օգտագործման «Մերսեդես Բենց» ավտոմեքենայով հետևել ու խաչմերուկում տեսել է Նվեր Աբելյանին՝ նրա «Ֆոլքսվագեն Տուարեգ» ավտոմեքենայի հետնամասում:
Նախկին փեսային կյանքից զրկելու դիտավորությամբ, ըստ մեղադրանքի, Աշոտ Խաչատրյանը մեծ արագությամբ իր մեքենայի առջևի մասով հարվածել է Նվերին, մեքենայի ընթացքի հետ նրան տարել առաջ, բախվել «Ֆոլքսվագենի» հետնամասին՝ երկու մեքենաների արանքում ճզմելով Նվեր Աբելյանին:
Վերջինս ծանր վնասվածքներով տեղափոխվել է Հրազդանի բժշկական կենտրոն, հետո՝ Երևանի թիվ 1 համալսարանական հիվանդանոց, բայց նույն օրվա ուշ երեկոյան՝ 23-ն անց 35 րոպեին գիտակցության չգալով՝ մահացել է:
Աշոտ Խաչատրյանին մեղադրանք է առաջադրվել դիտավորյալ սպանության համար՝ ՀՀ քրեական օրենսգրքի 104 հոդվածի 1-ին մասով: Սպանության գործիքը տվյալ դեպքում ավտոմեքենան է եղել:
Խաչատրյանի խափանման միջոցը կալանավորումն է: