Գերմանիայում վերջին ժամանակներս բազմաթիվ կազմակերպություններ նվազեցրել են աշխատակիցների արտաքին տեսքի նկատմամբ պահանջները: Այս թրենդը, որ ծնունդ է առել արագ աճող ստարթափների աշխարհում, տարածվում է նաև ավելի պահպանողական ոլորտներ՝ ներառյալ քաղաքականությունը և ավանդական բիզնեսը: Սովորական երևույթներ են դարձել ֆինանսական փորձագետը՝ ծալած թևքերով վառ վերնաշապիկով, կամ մենեջերը՝ ջինսով:
Փորձագետների կարծիքով՝ այդպիսի արտաքին տեսքը թույլ է տալիս երևալ ավելի ժամանակակից, իսկ մյուս կողմից՝ ավելի է մերձեցնում հաճախորդների հետ:
Իսկ ահա դասական կոստյումը՝ ինչպես տղամարդու, այնպես էլ կնոջ, կորցնում է իր նշանակությունը: Գերմանացիների կարծիքը՝ լավ է դա, թե վատ, բաժանվել է գրեթե հավասար մասերի: Այս մասին է վկայում YouGov-ի՝ վերջերս անցկացրած հարցումը: Հարցվածների 38%-ը դա գնահատում է որպես դրական երևույթ, 36%-ը՝ բացասական:
Պահարաններից դասական կոստյումի անհետացումից հատկապես գանգատվում են 55 և բարձր տարիքի հարցվածները (43%): Իսկ ամենից շատ ուրախանում են 25-34 տարեկան երիտասարդները (41%): Այս հարցման մեջ նրանք նույնիսկ գերազանցում 18-24 տարեկաններին (33%), որոնք դեմ չեն երբեմն այդպես հագնվել՝ հանուն ծանրակշռության:
Ընդհանուր առմամբ հարցված կանանց և տղամարդկանց միայն քառորդ մասն է հայտարարել, որ դասական կոստյում են հագնում գրասենյակներում (24%):
Պաշտոնապես հագնվելու առիթներից առաջին տեղում ընտանեկան միջոցառումներն են: Հարցվածների կեսից ավելին (51%) պատրաստ է կոստյում հագնել հարսանիքին, մկրտությանը և հուղարկավորությանը: Խիստ դրես-կոդը իր արդիականությունը չի կորցրել նաև թատրոն այցելելիս (38%):
