Սահմանադրական դատարանը երեկ՝ հուլիսի 18-ին, որոշում է կայացրել կասեցնել Երևան քաղաքի ընդհանուր իրավասության դատարանի և Ռոբերտ Քոչարյանի դիմումների հիման վրա Հայաստանի Հանրապետության քրեական օրենսգրքի 300.1 հոդվածի՝ Սահմանադրությանը համապատասխանության հարցը որոշելու վերաբերյալ գործերի վարույթները և դիմել է ՄԻԵԴ, ինչպես նաև Վենետիկի հանձնաժողով՝ խորհրդատվական կարծիք ստանալու նպատակով:
Այս առնչությամբ փաստաբան Նորայր Նորիկյանը «Առաջին լրատվական»-ի հետ զրույցում ասաց. «Ինձ համար ցավալի է, որ ՀՀ Սահմանադրական դատարանը, բացառիկ կարգավիճակ ունենալով հանդերձ, սեփական կարծիք չունի այս հարցի վերաբերյալ և դիմել է միջազգային, թեկուզև հեղինակավոր, կառույցներին՝ այդպիսի կարծիք ստանալու ակնկալիքով»:
Մեր զրուցակիցը ենթադրում է, որ ՍԴ-ն վաղը-մյուս օրը իր իսկ կողմից կայացված որոշման պատասխանատվությունից խուսափելու համար հղում է կատարելու ՄԻԵԴ-ի, ինչպես նաև Վենետիկի հանձնաժողովի խորհրդատվական եզրակացություններին:
Նորայր Նորիկյանը, պարզաբանելով, թե ինչու գործը հասավ այս հանգրվանին, և թե ինչու 300.1 հոդվածը դարձավ այսքան ակտուալ և հրատապ, նշեց. «Ցավով պետք է արձանագրեմ, որ մենք հայտնվել ենք մի իրավիճակում, երբ ըստ էության Սահմանադրական դատարանն է վճռելու Ռոբերտ Քոչարյանի ճակատագիրը: Սահմանադրական դատարանին դարձնել այսպիսի առանցքային մարմին, որը կարող է վճռել երկրորդ նախագահի ճակատագիրը, ես անընդունելի եմ համարում»:
Նրա խոսքով՝ վարույթն իրականացնող մարմինը, ինչպես նաև վարույթ իրականացնող մարմնի նկատմամբ դատավարական հսկողություն իրականացնող դատախազությունը պարտավոր էին, մինչև այս քրեական գործի հարուցումը, հաշվարկել բոլոր հնարավոր քայլերն ու հակաքայլերը. «Որպեսզի մենք հնարավորություն չտայինք որևէ սաբոտաժի, նախկին իշխանության հնարավոր դավադրության, որպեսզի Ռոբերտ Քոչարյանն ու իր սատելիտները զրկված լինեին այս գործով որևէ շահարկման հնարավորությունից»:
Նորայր Նորիկյանը այս մարմինների աշխատանքը անվանեց փնթի և Նիկոլ Փաշինյանին հիշեցրեց, որ ինքը դեռ մեկ տարի առաջ է իր կարծիքը հայտնել 300.1 հոդվածի վերաբերյալ խնդիր տեսնելու կապակցությամբ. «Այն ժամանակ այսօրվա ՀՔԾ պետը ամպագոռգոռ հայտարարում էր, թե ոչ կոմպետենտ մեկնաբանություններ են արվում: Դե, այսօր եկել է ձեր փնթի աշխատանքի համար պատասխան տալու ժամանակը»:
Հարցազրույցն ամբողջությամբ՝ տեսանյութում:
