Բուդաղյանների պաշտպան, փաստաբան Հայկ Ալումյանը սպասում է Քրեական վերաքննիչ դատարանում իր ներկայացրած վերաքննիչ բողոքի քննությանը: Փաստաբանը բողոքարկել է Սյունիքի նախկին մարզպետ Սուրիկ Խաչատրյանի և նրա որդու նկատմամբ հետախուզումը դադարեցնելու քննիչի գործողությունները:
Այսօր լրագրողների հետ հանդիպմանը Ալումյանն անդրադարձավ Սյունիքի նախկին մարզպետ Սուրիկ Խաչատրյանի՝ օրեր առաջ տված հարցազրույցին: Նա նշեց, որ նախկին մարզպետը դեպքը մեկնաբանել էր իր տեսանկյունից՝ խեղաթյուրելով փաստերը։
«Տրամագծորեն հակասում է նրա ներկայացրած այն հատվածը, թե Ավետիք Բուդաղյանին ուղղակի իջեցրել է մեքենայից։ Իրականում մեքենայի մեջ հարվածել են Ավետիք Բուդաղյանին։ Նախաքննական ցուցմունքում նույնիսկ Սուրիկ Խաչատրյանն է ընդունում, որ հարվածել են Ավետիք Բուդաղյանին։ Այնպես որ՝ այդ հարցազրույցում ինքն իրեն հերքում է։
Սուրիկ Խաչատրյանն ասել է նաև, թե Ավետիք Բուդաղյանն ալկոհոլ է օգտագործել. մենք կարող ենք այլ փաստեր բերել, բայց հարցը դա չէ: Այդ դեպքից առաջ խնջույք է կազմակերպվել, որտեղ տղամարդիկ են հավաքված եղել, և չի բացառվում, որ ոգելից խմիչք էլ օգտագործած լինեն»,- ասաց նա՝ հավելելով, որ լավ կլինի դրա փոխարեն խոսի փորձաքննությամբ իր տղայի արյան մեջ հայտնաբերված թմրանյութի մասին։
Անդրադառնալով հերմետիկ պատուհաններին՝ Ալումյանը նշեց, որ նախկին մարզպետը դրանով է պայմանավորում այն, որ իբր ինքը կրակոցների ձայնը լսել չէր կարող լսել, քանի որ իր ննջարանը գտնվում է տան հակառակ կողմում, իսկ այնտեղ պատուհանները հերմետիկ փակված են եղել: Ալումյանը հիշեցրեց, որ նախկին մարզպետն ասել է նաև, թե գետի ձայնը չի թողել, որ կրակոց լսի: Ուրեմն ինչպե՞ս եղավ, որ գետի ձայնը լսվել է հերմետիկ փակված պատուհաններից, իսկ կրակոցի ձայնը չի լսվել։
Փաստաբանը նշում է, որ սա այն գործերից չէ, որտեղ քննիչը մեծ դերակատարություն է ունենում, իսկ ինքը՝ Սուրիկ Խաչատրյանը, իր հարցազրույցում մի քանի անգամ է հակասել իր նախաքննական ցուցմունքներին:
Լրագրողների հարցին՝ իմաստ կա՞ վերաքննիչ դատարան դիմելու, Հայկ Ալումյանը պատասխանեց, թե հույսն ամեն դեպքում պետք չէ կորցնել, պետք է մտածել, որ մի օր դատական ատյաններն սկսելու են արդար ու անաչառ գործել։
«Մենք միանշանակ դիմելու ենք Եվրոպական դատարան, ամեն ինչ անելու ենք, որ այդ գործը հասնի դատարան։ Եթե իրենք անկեղծ են, ինչո՞ւ են ամեն ինչ անում, որ վեց ամիս շարունակ գործը դատարան չհասնի»,- ասաց փաստաբանը:
Դիտարկմանը, թե Ավետիք Բուդաղյանի եղբոր՝ Արտակ Բուդաղյանի լռությունը շատերը տարօրինակ են համարում, շահարկում են այն, փաստաբանը նշեց, որ այդտեղ շահարկելու ոչինչ չկա, ուղղակի նա մեծ կորուստ է ունեցել, նրան էլ պետք է հասկանալ: Բացի այդ՝ Բուդաղյանը նախաքննության ընթացքում բազմաթիվ ցուցմունքներ է տվել:
