«Սահմանադրության մեջ նույնիսկ մեկ ստորակետը կարող է վճռորոշ լինել։ Չպետք է անտեսել եզրույթները։ Եթե գրվում է Սահմանադրություն, այն պետք է հստակ լինի։ Հիմա չկա հստակություն, ապա ՍԴ անդամը ոչ մի պարագայում չի կարող համարվել ՍԴ դատավոր»,- «Առաջին լրատվական»-ի հետ զրույցում ասաց ԵՊՀ Սահմանադրության ամբիոնի դոցենտ Սամվել Մուրադյանը։ «Սահմանադրական դատարանը ներկա պահին ունի երկու դատավոր։ ՍԴ ներկա անդամներին չեն կարող աշխատանքից հեռացնել, քանի որ անցումային դրույթներով նրանք ՍԴ անդամներ են, բայց նրանց լիազորությունները լիարժեք չեն և նրանք չեն կարող որոշումներ կայացնել։ Քաղաքական միավորը կարող է ասել, որ չի ընդունում ՍԴ-ի որոշումները»,- ասաց Մուրադյանը՝ հավելելով, որ ստեղծված իրավիճակը պետք է կամ լուծեն օրենսդիր ու գործադիր մարմինները, կամ էլ հարցը լուծվի քաղաքական ճանապարհով։ «Հարցը ունի երկու լուծում՝ քաղաքական և իրավական։ Ականը դրված է»,- ասաց մեր զրուցակիցը։
Մուրադյանը անդրադարձավ նաև ՍԴ-ի՝ օրերս տարածած հայտարարությանը։ Նրա խոսքերով՝ օրենքում չկա դրույթ, որ Սահմանադրական դատարանը կարող է մեկնաբանել սահմանադրական նորմը։ ՍԴ-ն քննում և որոշումներ է կայացնում տարբեր օրենքների՝ Սահմանադրությանը համապատասխանության մասին։
Առավել մանրամասն՝ տեսանյութում։
