Ձեր և Վարազդատ Կարապետյանի կողմից ներկայացված նվազագույն աշխատավարձի բարձրացման առաջարկը հավանության արժանացավ կառավարության կողմից, ավելին՝ առաջարկեցին, որ 63 հազարի փոխարեն սահմանել 68 հազար դրամ։ Սա, իհարկե, բյուջեի վրա ծանրաբեռնվածություն կավելացնի։ Հաշվարկվել է հստակ, թե որքան միջոցներ են հարկավոր, և սրա համար միջոցներ այսօր կա՞ն, թե՞ ոչ «Առաջին լրատվական»-ի հարցին ԱԺ «Իմ քայլը» խմբակցության պատգամավոր, ԱԺ տնտեսական հարցերի մշտական հանձնաժողովի նախագահ Բաբկեն Թունյանը պատասխանեց․ «Մենք ի սկզբանե առաջարկել էինք նվազագույն աշխատավարձը 65 հազար դարձնել։ Հետո հաշվի առնելով ռիսկերն ու ծախսերը, այն իջեցրինք 63 հազար դրամի։ Հիմա կառավարությունն առաջարկում է նվազագույն աշխատավարձը դարձնել 68 հազար դրամ, որովհետև աշխատանքի և սոցիալական հարցերի նախարարությունը որոշակի հետազոտություն է արել ու պարզել է՝ 68 հազարը դա այն շեմն է, որ թույլ կտա միջին վիճակագրական ընտանիքին աղքատության գծից վերև գտնվել։ Մենք սկզբունքորեն դեմ չենք 68 հազարին, բայց այդ առաջարկը դեռ պետք է գա Ազգային ժողով, քննարկենք այն և որոշենք՝ ընդունո՞ւմ ենք, թե՞ ոչ»։
Բաբկեն Թունյանը նաև հավելեց․ «Պետք է նշեմ, որ այստեղ մեկ-երկու նկատառում կա, որոնցից ամենակարևորը բազային աշխատավարձն է։ Ինչ է դա նշանակում։ Եթե 68 հազարը ընդունվեց, ապա բազային աշխատավարձը ավտոմատ դառնում է նվազագույնը մոտ 70 հազար դրամ, իսկ դա իր հերթին կբերի պետական պաշտոնյաների աշխատավարձերի բարձրացման։ Օրինակ՝ 68 հազարի ժամանակ, եթե այլ օրենսդրական փոփոխություն չարվի, ապա Ազգային ժողովի պատգամավորը 660 հազար դրամի փոխարեն կստանա մոտ 700 հազար աշխատավարձ։ Կստացվի, որ մենք ցանկանում էինք մարդկանց 10-13 հազար դրամի օգուտ տալ, բայց ինքներս մեզ 40 հազար դրամի օգուտ տվեցինք։ Դրա համար մենք առաջարկել ենք՝ բերեն այնպիսի մեխանիզմեր, որով բազային աշխատավարձը չի բարձրանա»։
Մանրամասները՝ տեսանյութում։
