Թուրքիայի նախագահ Ռեջեփ Թայիփ Էրդողանը իր համոզմունքն է հայտնել առ այն, որ Միացյալ Նահանգները պատժամիջոցներ չի կիրառի Թուրքիայի դեմ: Խոսքը ավելի վաղ արտահայտված Վաշինգտոնի հնարավոր պատասխանի մասին է՝ կապված Անկարայի կողմից ռուսական С-400 «Տրիումֆ» զենիթահրթիռային համալիրների ձեռք բերման հետ:
Այս մասին Էրդողանը հայտարարել է շաբաթ օրը՝ հունիսի 29-ին, ԱՄՆ նախագահ Դոնալդ Թրամփի հետ G20-ի շրջանակներում հանդիպումից հետո: Այս մասին գրում է DW-ն:
«Նա (Դոնալդ Թրամփը) անձամբ ինձ խոստացել է, որ դա (Թուրքիայի դեմ ԱՄՆ պատժամիջոցների ներմուծումը) տեղի չի ունենա»,- ասել է Էրդողանը:
Ավելի վաղ ԱՄՆ նախագահը հավաստիացրել է, որ Վաշինգտոնն ու Անկարան բանակցություններ են վարում՝ կապված թուրք-ռուսական համաձայնագրի հետ, գտնելու համար այդ խնդրի «տարբեր լուծումներ»: Ընդ որում, ԱՄՆ նախագահը չի բացառել պատժամիջոցների կիրառումը ընդդեմ Թուրքիայի՝ թուրքերի կողմից ռուսական զենիթահրթիռային համալիրներ ձեռք բերելու դեպքում:
Միաժամանակ Թրամփը հիշել է, որ իր իրավանախորդ Բարաք Օբաման «շատ անարդարացի է» վարվել Թուրքիայի հետ՝ հրաժարվելով թուրքական կողմին վաճառել ամերիկյան հակաօդային Patriot համակարգեր:
