Պաղեստինցիներն այրել են ԱՄՆ նախագահ Դոնալդ Թրամփի խրտվիլակը և մի ավանակ բերել, որի վրա փակցված են Պարսից ծոցի երկրների թագավորական ընտանիքների անդամների պատկերները՝ Բահրեյնում համաժողովի սկսվելու հետ կապված բողոքի ակցիայի շրջանակում, որտեղ ներկայացվելու է Սպիտակ տան երկար սպասված ծրագրի տնտեսական մասը իսրայելա-պաղեստինյան հակամարտության կարգավորման վերաբերյալ, տեղեկացնում է AP-ը։
Համաժողովում, որը տեղի կունենա այս շաբաթ, Թրամփի վարչակազմը հույս ունի ձեռք բերել Պարսից ծոցի հարուստ երկրների խոստումները իր տնտեսական ծրագրի ֆինանսավորման համար, որը նախատեսում է ներդրումներ 50 մլն դոլարի չափով և ենթակառուցվածքային նախագծեր Արևմտյան ափին, Գազայի հատվածում և արաբական երկրներում։
«Պաղեստինը չի վաճառվում»,- վանկարկել են ցուցարարները՝ դուրս գալով Արևմտյան ափի խոշոր քաղաքների փողոցներ։ «Բահրեյնից մինչև Սաուդյան Արաբիա մեզ չեն դյութում ձեր միլիոնները»։
Եգիպտոսը, Սաուդյան Արաբիան, Մարոկոն, Հորդանանը և Պարսից ծոցի տարբեր երկրներ իրենց ֆինանսական ներկայացուցիչներին են ուղարկել համաժողովին։
Սպիտակ տունը հայտարարում է, որ չի հրավիրել իսրայելցի ներկայացուցիչների, որպեսզի միջոցառումը «ապաքաղաքական» լինի։ Պաղեստինն իր կողմից մերժել է պլանը և նշել, որ չի ցանկանում որևէ ընդհանուր բան ունենալ կոնֆերանսի հետ։
Բախումներն սկսվել են այն ժամանակ, երբ ցուցարարները սկսել են քարեր նետել իսրայելցի զինվորների ուղղությամբ, որոնք ի պատասխան արցունքաբեր գազ են կիրառել և կրակել ռետինե փամփուշտներով՝ ամբոխին ցրելու համար։ Հյուսիսային Նաբլուս քաղաքում ընդվզողները սյան վրա կախել են նախագահ Թրամփի պատկերը։
Պաղեստինյան բազմաթիվ կազմակերպություններ կոչ են արել շարունակել զանգվածային հանրահավաքներն Արևմտյան ափին և Գազայի հատվածում՝ համաժողովի առիթով, որը պետք է սկսվի երեքշաբթի երեկոյան։
Գազայում խանութները և պետական հաստատությունները փակվել են համընդհանուր գործադուլի շրջանակում։
Պաղեստինցիները դեմ են Թրամփի թիմի ներկայացրած առաջարկին, որը նախատեսում է առողջապահության, կրթության և հանրային աշխատանքների ոլորտների նախագծեր, բայց չի վերաբերում Իսրայելի կողմից Արևմտյան ափի զավթմանը կամ Գազայի շրջափակմանը։
«Մեզ փող պետք չէ։ Մենք հացի կարիք չունենք։ Մենք արժանապատվության կարիք ունենք»,- ասել է գազացի բժիշկ Սաիդ Ջադբան։ «Երբ մենք ստանանք (մեր արժանապատվությունը), մենք կհայտնվենք ամենահարուստ երկրների շարքում»։