Կոտայքի մարզի ընդհանուր իրավասության դատարանում Յուրի Բաղդասարյանի նախագահությամբ ավարտվել է Արշալույս Փարսադանյանի գործի դատական քննությունը: Մինչև դատական վիճաբանություններին անցնելը մեղադրողը՝ Կոտայքի մարզի դատախազի տեղակալ Ա. Սարգսյանը, միջնորդել էր ինքնասպանության հասցնելու մեղադրանքով՝ ՀՀ քրեական օրենսգրքի 110 հոդվածի 1-ին մասով, ամբաստանյալ Փարսադանյանի նկատմամբ քրեական հետապնդումը դադարեցնել:
Ընդհանուր իրավասության դատարանը բավարարել էր մեղադրողի միջնորդությունը և ինքնասպանության հասցնելու մասով դադարեցրել Արշալույս Փարսադանյանի քրեական հետապնդումը:
Նախաքննական մարմինը Արշալույսին մեղադրել է միայն պոռնկությանը նպաստելու համար՝ ՀՀ քրեական օրենսգրքի 262 հոդվածի 2-րդ մասի 5-րդ կետով:
Համաձայն առաջադրված մեղադրանքի՝ 2012 թվականի մայիսին գործով վկաներ Հասմիկը, Սոնյան ու Լարիսան Արշալույսի առաջարկով գնացել են «Վենեցիա» հյուրանոցային համալիր, սեռական հարաբերություն ունեցել հաճախորդների հետ:
Հաջորդ օրը յուրաքանչյուրի համար Արշալույսին վճարվել է 10 հազարական դրամ, ընդամենը՝ 40 հազար դրամ: Սոնյային գումարը տալուց հետո Արշալույսը նրանից պահանջել ու ստացել է 2 հազար դրամ՝ որպես միջնորդավճար:
Այնուհետև Նոյեմբերյան քաղաքում Սոնյան սեռական հարաբերություններ է ունեցել Արշալույսի ծանոթի հետ, հաջորդ օրը Արշալույսից խնդրել է իր ծառայության վճարը, բայց վերջինս գումարը չի տվել, պահանջել է փողի մասին չխոսել՝ սպառնալով, թե մարմնավաճառության մասին կհայտնի մարմնավաճառուհու հարազատներին:
Մայիս ամսին Լարիսան Արշալույսի միջնորդությամբ սեռական հարաբերություններ է ունեցել նրա ծանոթների հետ, ու Արշալույսն ամեն անգամ Լարիսային տվել է 5 հազար դրամ:
Մարմնավաճառուհիների ու նրանց միջնորդի միջև անհամաձայնություններ են եղել, և մարմնավաճառուհիները բացահայտել են Արշալույսի գործունեությունը:
Դատարանում Արշալույսն իրեն մեղավոր չի ճանաչել:
Իր գրավոր ցուցմունքում նա հայտնել է, թե Հայկուհուն թույլ է տվել 20-22 օր մնալ իր տանը, քանի որ ցուրտ էր, Հայկուհին էլ վառելիք չուներ:
Իր տանը եղած ժամանակ Հայկուհին ոչ մեկի հետ սեռական հարաբերություններ չի ունեցել, այդ նպատակով իր հետ որևէ տեղ չի գնացել: Իրեն հաճախ են հրավիրել խնջույքների, բայց ինքը ոչ մեկին մարմնավաճառության չի ներքաշել կամ դրդել:
Իր տնից Հայկուհուն դուրս է հանել, երբ առանց իրեն տեղյակ պահելու Հայկուհին իր տուն է բերել երկու տղամարդու՝ պարսկահայի ու պարսիկի, որոնց հետ խոսելիս ինքը հասկացել է, որ նրանք ինչ-որ վտանգավոր գործարք են կատարում: Վախեցել է ու նրանց երեքին էլ իր տնից հանել:
Ինչ վերաբերում է հաջորդ դրվագին՝ Նոյեմբերյան գնալուն, ապա այնտեղ իրեն հրավիրել էր ընկերներից մեկը՝ եղնիկի միս ուտելու: Ինքը ընկերուհիների՝ Մարգարիտայի, Սոնյայի ու Լարիսայի հետ գնացել է Նոյեմբերյան: Այնտեղ սեռական հարաբերություն ունենալու մասին խոսք չի եղել: Իրենք ընկերների հետ հաց են կերել, զրուցել, կատակներ արել, որից հետո գնացել են «դիրքերը» տեսնելու: Սոնյան իրենց հետ «պոստեր» չի գնացել, մնացել է իր ծանոթ Կարենի տանը:
Հաջորդ օրը բոլորը միասին վերադարձել են Աբովյան, գումարի մասին խոսք չի եղել:
Հաջորդ՝ Գետամեջ գնալու դրվագով Արշալույսը հայտնել է, թե այդ գյուղ են գնացել, քանի որ Հասմիկին կանչել էր նրա վաղեմի ծանոթը: Իրենք գնացել են, բայց չեն իմացել Հասմիկին գումար տրվել է, թե ոչ:
Արշալույսը, հարցերին պատասխանելով, ասել է, թե «Վենեցիա» ռեստորան է գնացել իր ծանոթների հրավերով՝ Հասմիկի, Սոնյայի ու Լարիսայի հետ: Իրենք հրավիրված են եղել նաև «Ղարս» հյուրանոց, որտեղ եղել են 22 հոգի:
Արշալույսն ասել է նաև, թե իրեն նախաքննության ժամանակ ծաղրել են: Իրեն առաջադրված մեղադրանքի հետ համաձայն չէ. ինքը ոչ ոքի պոռնկության չի դրդել:
Արշալույսին «կենցաղում» կոչել են Գայանե:
Ըստ մարմնավաճառուհիների՝ Արշալույսն առաջարկել է հանդիպել անծանոթ տղաների հետ ու գումար աշխատել:
Պատահել է, որ նա ընկերուհիներին ուղարկել է մարմնավաճառության, ինքը փողը վերցրել ու նրանց չի տվել:
Մի մարմնավաճառուհի ցուցմուքն է տվել, որ ապրել է Արշալույսի տանը: Հոսանքն անջատել են գումարը չվճարելու պատճառով: Ինքը, Արշալույսի խնդրանքով, հոսանքի պարտքի դիմաց սեռական հարաբերություն է ունեցել էլեկտրիկի հետ:
Եղել են դեպքեր, երբ Արշալույսն ասել է, թե եղբայրն է գալու, ընկերուհին պիտի ուրախացնի եղբորը: Մարմնավաճառուհին «ուրախացրել է», բայց իր աշխատանքի դիմաց գումար չի ստացել, և ինքը չի ուրախացել:
Այս կինն ասել է, թե Արշալույսի տնից հեռացել է, որովհետև նրա կողմից շատ է շահագործվել:
Գործով անցնող մարմնավաճառուհիները մանրամասն նշել են, թե որ հյուրանոցներում են եղել Արշալույսի հետ, ինչքան են «աշխատել», ինչքան գումար են ստացել, ինչքան չեն ստացել Արշալույսից:
Ընդհանուր իրավասության դատարանը Արշալույս Փարսադանյանին մեղավոր է ճանաչել պոռնկությանը նպաստելու համար, բայց նրան առաջադրված մեղադրանքը ՀՀ քրեական օրենսգրքի 262 հոդվածի 2-րդ մասի 5-րդ կետից վերաորակել է ավելի մեղմ մասով՝ 262 հոդվածի 1-ին մասով՝ մեղսագրված որոշ դրվագներ համարելով չապացուցված:
Արշալույս Փարսադանյանը դատապարտվել է 2 տարի ազատազրկման: Նրա նկատմամբ համաներում է կիրառվել, ու նա ազատվել է նշանակված պատժից: Արշալույսի խափանման միջոց կալանավորումը վերացվել է, ու նա անհապաղ ազատ է արձակվել դատարանի դահլիճում:
