Վահե Գրիգորյանը հունիսի 20-ին խորհրդարանում երդվեց և հայտարարեց, որ ստանձնում է ՍԴ նախագահի լիազորությունների կատարումը։ Գրիգորյանը հայտարարեց, որ այս երդում տալով՝ դառնում է ՍԴ երկրորդ դատավորը, և հավելեց, որ ստանձնում է նաև ՍԴ դատարանի նախագահի պաշտոնը՝ հղում անելով Սահմանադրության 166-րդ և 177-րդ հոդվածներին:Թեմայի շուրջ « Առաջին լրատվական»-ի հետ քննարկմանը մասնակցեցին վերլուծաբան, քաղտեխնոլոգ Վիգեն Հակոբյանը և քաղաքագետ Անդրիաս Ղուկասյանը:
«Սա եթե նույնիսկ իրավական կազուս չէ, ապա կարծում եմ՝ քաղաքական կազուս է, որովհետև քաղաքական նոր իրավիճակ է ստեղծում, նույնիսկ քաղաքական նոր օրակարգ. այսօրվա դրությամբ՝ ՍԴ-ի շուրջ են պտտվում օրակարգային շատ հարցեր… Կարծում եմ՝ դեռևս սուր բանավեճերն առջևում են՝ թե՛ իրավական դաշտում, թե՛ դրանից բխող քաղաքական: Սա իրավական շոկ է»,- նշեց Վիգեն Հակոբյանը՝ հավելելով, որ դեռևս արդիական է ՍԴ նախագահի հարցը և հնարավոր է լինեն բողոքարկումներ, տարբեր կարծիքներ հնչեն: «Բավականին լուրջ իրավական խառնաշփոթ է, որը հղի է լուրջ քաղաքական խառնաշփոթով ու խնդիրներով»,- ընդգծեց վերլուծաբանը:
Անդրիաս Ղուկասյանի դիտարկմամբ՝ Սահմանադրությունը պարունակում է հակասություններ՝ որպես իրավական տեքստ. «Այս Սահմանադրությունը չէր անցնի նույնիսկ մշակման փուլը, եթե չլիներ քաղաքական մեծ միջամտություն: Պատահական չէ, որ շատ մարդիկ և քաղաքական դաշտի մեծամասնությունը դեմ էր այդ Սահմանադրությանը: Այս խնդիրները հիմք են հանդիսանում նոր Սահմանադրություն ընդունելու համար: Լրջագույն պրոբլեմ է, որ իրավական համակարգը չունի ամուր հիմք, ինչը քաղաքական ճգնաժամերի առաջացման առիթ կարող է լինել»:
Մանրամասն՝ տեսանյութում: