Այսօր ԱԺ-ում արտահերթ նիստ է գումարվել, որտեղ քննարկվում էր ԲԴԽ անդամի թեկնածուի հարցը: «ԼՀԿ-ն բանակցությունների մեջ է «Իմ քայլը» խմբակցության հետ, ուզում ենք առաջադրել ԲԴԽ-ի անդամի մեր թեկնածուին, «Իմ քայլը» թեկնածու չառաջադրի, և մեր թեկնածուն անցնի»,- «Առաջին լրատվական»-ի հետ զրույցում այս մասին ասաց ԱԺ «Լուսավոր Հայաստան» խմբակցության նախագահ Էդմոն Մարուքյանը:
«Եթե մեզ չհաջողվի թեկնածու առաջադրել կամ չընտրվի մեր թեկնածուն, մենք կարող ենք չվստահել ԲԴԽ-ին: Եղավ պրոցես, և հրաժարական տվեցին ԲԴԽ երեք դատավոր անդամները, բայց դրանից հետո ընտրվում են միայն նրանք, ում ներկայացնում է իշխանությունը: Մենք կարող ենք կասկածի տակ առնել, եթե իշխանությունը չլինի համագործակցային և բազմազանություն չապահովի՝ ընդդիմադիր քաղաքական ուժերի ներկայացրած անձանց ներառելով»- հավելեց ԼՀԿ նախագահը:
Հիշեցնենք, որ երեկ ԲԴԽ-ի անդամ ընտրվեց «Իմ քայլ»-ի թեկնածու Գրիգոր Բեքմեզյանը, իսկ այսօր նույն խմբակցությունը թեկնածու է առաջադրել Վիգեն Քոչարյանին: Է. Մարուքյանի խոսքով՝ Վ. Քոչարյանը լավ թեկնածու է, ապաքաղաքական մարդ է:
Խոսելով դատական համակարգի առողջացման գործընթացի մասին՝ Մարուքյանը նկատեց, որ գործընթացի մեկնարկը տրված է. «Ձուկը գլխից է հոտած. ԲԴԽ-ն այդ ձկան գլուխն է, ուզում ենք մաքրել պոչից»:
Ինչո՞ւ է առաջացել ՍԴ նախագահի լեգիտիմության հարցը: Այս հարցին ի պատասխան՝ Մարուքյանը նշեց, որ ՍԴ նախագահի լեգիտիմության հարցը դրվել է նաև նախկինում, երբ ընտրվել է Հրայր Թովմասյանը՝ պատճառաբանելով, որ ԱԺ-ն է ընտրել, հին Սահմանադրությամբ է ընտրվել և այլն… «Հիմա նորընտիր ՍԴ դատավոր Վահե Գրիգորյանը հայտարարում է, որ ինքը ստանձնում է ՍԴ նախագհի պաշտոնը… Այս առումով՝ չեմ կարող պնդել, որ ճգնաժամ կա, ճգնաժամ կլինի այն ժամանակ, երբ ՍԴ-ն չկորղանա իրականացնել սահմանադրական արդարադատություն: Կա բանավեճ դատարանի ներսում… Առայժմ
Հրայր Թովմասյանը ՍԴ նախագահն է, նրա նախագահությունը վիճարկվում է մեկ դատավորի կողմից: ՍԴ-ն ունի ևս յոթ դատավոր, եթե նրանք էլ միանան Վահե Գրիգորյանին, լուրջ փոփոխություն կարող է լինել… Վահե Գրիգորյանը հայտարարել է, որ ՍԴ նախագահն է, եթե նա չդառնա ՍԴ նախագահ, լուրջ խնդիրներ կունենա… Եթե ինչ-որ բան ես ասել, պետք է անես…»:
Մանրամասն՝ տեսանյութում: