Թեհրանը չի պատրաստվում պատերազմ սանձազերծել, բայց լիովին պատրաստ է մարտական գործողություններին ագրեսիայի դեպքում: Այդ մասին հունիսի 20-ին հայտարարել է Իսլամական հեղափոխության պահապանների զորակազմի (ԻՀՊԶ) հրամանատար բրիգադի գեներալ Հոսեյն Սալամին:
«Մենք հայտարարում ենք, որ մտադիր չենք պատերազմ սարձազերծել որևԷ երկրի դեմ, բայց պատրաստ ենք ցանկացած մարտական գործողության Իրանի դեմ ագրեսիայի դեպքում: Ամերիկյան խոցված անօդաչուի հետ կապված միջադեպը դրա վկայությունն է»,- «Մեհր» գործակալությունը մեջբերել է Սալամիի խոսքը: Նա նաև նշել է, որ ԱՄՆ-ի հետախուզական անօդաչու սարքի ոչնչացումը հստակ ազդանշան է Վաշինգտոնին, որ Թեհրանը պատրաստ է պաշտպանել իր սահմանները: «Մեր սահմանները «կարմիր գիծ» են: Բոլոր նրանք, ովքեր կհատեն այդ սահմանը, չեն վերադառնա ու կոչնչացվեն,- ասել է ԻՀՊԶ-ի ղեկավարը:- Մեր հակառակորդների համար միակ ճանապարհը Իրանի տարածքային ամբողջականության և ազգային շահերի հարգումն է»: Press TV իրանական հեռուստաալիքը հունիսի 20-ին հայտնել է, որ ԻՀՊԶ-ի մարտիկները խոցել են Global Hawk հետախուզական անօդաչու թռչող սարքը: Նշվել է, որ անօդաչուն խփվել է Իրանի հարավի Խորմոզգանի նահանգի երկնքում այն բանից հետո, երբ ներխուժել է երկրի օդային տարածություն: ԱՄՆ-ի ներկայացուցիչները հերքել են Իրանի օդային տարածությունում իրենց անօդաչուի թռիչքների վերաբերյալ տեղեկատվությունը: Ավելի ուշ Reuters գործակալությունը, վկայակոչելով ԱՄՆ-ի զինված ուժերի մի ներկայացուցչի, հայտնել է, որ իրանական «երկիր-օդ» դասի հրթիռը ԱՄՆ-ի MQ-4C Triton անօդաչուն խոցել է Հորմուզի նեղուցում՝ միջազգային օդային տարածությունում:
Թեհրանում շարունակում են պնդել, որ դրոնը խոցվել է երկրի օդային տարածությունում, հաղորդել է ՏԱՍՍ-ը: