Հայաստանի և Ադրբեջանի արտգործնախարարների՝ Վաշինգտոնում կայանալիք հանդիպմանն ընդառաջ հունիսի 18-ին տեղի է ունեցել Հայաստանի ԱԳ նախարար Զոհրաբ Մնացականյանի հանդիպումը ԵԱՀԿ Մինսկի խմբի համանախագահներ Իգոր Պոպովի (Ռուսաստան), Ստեֆան Վիսկոնտիի (Ֆրանսիա), Էնդրյու Շոֆերի (ԱՄՆ), ինչպես նաև ԵԱՀԿ գործող նախագահի անձնական ներկայացուցիչ Անջեյ Կասպրշիկի հետ։
Թեմայի շուրջ «Առաջին լրատվական»-ը զրուցեց միջազգայնագետ Սուրեն Սարգսյանի և ԱԺ «Իմ քայլը» խմբակցության պատգամավոր Սոս Ավետիսյանի հետ:
Հանդիպման ընթացքում զրուցակիցները գնահատել են խաղաղ գործընթացի ներկա իրավիճակը, այդ թվում՝ նախկին հանդիպումների ընթացքում ձեռք բերված պայմանավորվածությունների իրականացման համատեքստում։ Անդրադառնալով այս դիտարկմանը և հարցին, թե բանակցային գործընթացն ինչ փուլում է, Ս. Ավետիսյանը նշեց. «Նորմալ բանակցային գործընթացի համար շատ կարևոր է խաղաղությունը և դրան ուղղված մթնոլորտ ստեղծելը, մինչդեռ վերջին օրերին Ադրբեջանի կողմից սադրանքները չեն նպաստում դրան, հետևաբար պետք է խոսել միայն այս երևույթի շուրջ, չեմ կարծում, թե այլ օրակարգային ծավալումներ կարող են տեղի ունենալ… »:
Սուրեն Սարգսյանն ընդգծեց, որ իր կարծիքով այս խնդրի խաղաղ լուծում գոյություն չունի. «Շատ լավ է, որ կա բանակցությունների գործընթաց, որովհետև հասկանալի է, թե դրա այլընտրանքը որն է, բայց, ցավոք, ամենակարևոր և սկզբունքային հարցերի վերաբերյալ մենք ունենք այնքան ծայրահեղ կարծիքներ, որ ընդհանուր հայտարարի գալը պարզապես անհնար է…»:
Մանրամասն՝ տեսանյութում: