Քրեական «հեղինակություն» Թևոս Սաֆարյանի եղբոր սպանության գործով կալանավորված Տիգրան Ասատրյանի մոտ ոչ տեսակցություններն են թույլատրում, ոչ էլ թույլ են տալիս հեռախոսից օգտվել, այսինքն` նրա հետ տեսակցությունների և հեռախոսազանգերի վրա արգելանք է դրված: Այս մասին shamshyan.com-ի թղթակցի հետ զրույցում ասել է Արթուր Սաֆարյանի սպանության գործով կալանավորված Տիգրան Ասատրյանի պաշտպանը՝ Վարդուհի Էլբակյանը:
Նրա խոսքով, գործը զրոյական վիճակում է. ոչ քննիչներն են մոտը գնացել, ոչ էլ նոր հարցաքննություն և փորձաքննություն է նշանակվել: Դիտարկմանը, թե դա բնականոն ընթացք է, թե ոչ, ասել է. «Ո՛չ, ես դա բնականոն չեմ համարում: Միգուցե իրենք ինչ-որ բան անում են: Չեմ ասում՝ չեն աշխատում, բայց իմ պաշտպանյալի հետ կապված՝ կարծում եմ, որ ոչ մի ջանասիրություն չի ցուցաբերվում գործի հանգամանքները պարզելու առումով»:
Պաշտպանը նաև նշել է, որ արդեն պատրաստվում են միջնորդություններով հանդես գալ: «Գտնում եմ, որ հանցակազմ ընդհանրապես չկա, պետք է գործը կարճվի և խափանման միջոցը փոխվի: Տիգրան Ասատրյանն առողջական լուրջ խնդիրներ էլ ունի, հետևաբար նրա՝ կալանքի տակ գտնվելն արդեն վտանգավոր է դառնում: Սրտի հետ կապված խնդիրներ ունի, դրսում էլ է մշտապես բուժվել»,- ավելացրել է Վարդուհի Էլբակյանը:
Մանրամասները՝ shamshyan.com-ում
