Չինաստանի Huawei հեռահաղորդակցությունների հսկայի հասույթն առաջիկա երկու տարում 30 մլրդ դոլարով կկրճատվի ընկերությանը սև ցուցակում ներառելու ԱՄՆ իշխանությունների որոշման պատճառով: Այդ մասին հունիսի 17-ին Չինաստանի Կենտրոնական հեռուստատեսության եթերում հայտարարել է Huawei-ի հիմնադիր Ժեն Չժենֆեյը:
«Ես ենթադրում եմ, որ առաջիկա երկու տարում մենք կկրճատենք մեր արտադրությունը, և մեր հասույթը 30 մլրդ դոլարով պակաս կլինի, քան կանխատեսվում էր ավելի վաղ»,- նշել է նա:
Huawei-ը հիմնադրվել է 1987 թվականին: Այն արտադրում է հեռահաղորդակցական սարքավորումներ, ինչպես նաև սպառողական սարքեր ու սմարթֆոններ:
Ընկերության արտադրանքն ու ծառայությունները հասանելի են ավելի քան 170 պետություններում: Huawei-ը միջազգային տնտեսական պատժամիջոցների սպառնալիքի տակ Է հայտնվել այն բանից հետո, երբ ԱՄՆ-ը և Ավստրալիան նրան մեղադրեցին իր սարքավորուների օգնությամբ գաղտնի տվյալները հավաքելու մեջ:
Մայիսի 15-ին ԱՄՆ-ի նախագահ Դոնալդ Թրամփը հրամանագիր է ստորագրել, որով արտակարգ դրության ռեժիմ է սահմանվում Միացյալ Նահանգների տեղեկատվական-հաղորդակցական ռեժիմը օտարերկրյա սպառնալիքներից պաշտպանելու համար: Այդ կապակցությամբ ԱՄՆ-ի առեւտրի նախարարությունը մայիսի 17-ից Huawei-ին սև ցուցակի մեջ է մտցրել ազգային անվտանգության սպառնալիքի պատճառով: Անցյալ տարվա օգոստոսին Թրամփը ստորագրել է հրամանագիր, որն ԱՄՆ-ի կառավարական գերատեսչություններին արգելել է օգտագործել Huawei-ի և չինական ևս մեկ ընկերության՝ ZTE-ի կողմից արտադրված սարքավորումները: Huawei-ն ամերիկյան իշխանությունների որոշումը որակել է որպես ոտնձգություն իր օրինական իրավունքների դեմ, հավելելով, որ դրա պատճառով ԱՄՆ-ում «կդանդաղի 5G ցանցի ծավալումը»:
