Грузия Online-ի փոխանցմամբ՝ Մեծ Բրիտանիայում և Հյուսիսային Իռլանդիայում վրաց ուղղափառ եկեղեցու թեմի առաջնորդ Զենոնը «Палитра»-ի ռադիոեթերում հայտարարել է, որ Ռուսաստանում Հայոց կաթողիկոս Գարեգին Բ-ն, բռունցքով հարվածելով սեղանին, վրացական կողմից պահանջել է բավարարել հայկական կողմի պահանջները.
«Բոլորին հայտնի է նրա վերաբերմունքը վրացական եկեղեցու նկատմամբ։ Ռուսաստանում ռուսական պատվիրակության հետ կայացած հանդիպման ժամանակ Գարեգին Բ-ն, բռունցքով հարվածելով սեղանին, պահանջել է բավարարել հայկական կողմի պահանջները։ Այդ հանդիպմանը ներկա է գտնվել նաև վրացական եկեղեցու պատվիրակությունը։
Հենց այդ դեպքից հետո էլ հայ և վրաց եկեղեցիների փոխհարաբերությունները սկսեցին վատանալ։ Մի քանի տարի առաջ, երբ Վրաստանի պատրիարքարանի և մյուս կրոնական համայնքների ներկայացուցիչների միջև հուշագիր ստորագրվեց, մենք պայմանավորվեցինք, որ կարգավիճակի հարցը կքննարկենք մյուս հարցերի հետ մեկտեղ։
Մինչդեռ ներկայումս ստացվում է, որ հայկական կողմի պահանջները բավարարվել են միակողմանիորեն. նրան շնորհվել է կարգավիճակ, այժմ նա կարող է հայտ ներկայացնել ունեցվածքի նկատմամբ։
Հայոց եկեղեցու նկատմամբ վրացական իշխանությունների դիրքորոշումն ընդհանուր առմամբ հասկանալի չէ։ Անհասկանալի է, թե ինչով է պայմանավորված Հայոց եկեղեցու հանդեպ ցուցաբերած նրանց աջակցությունը, երբ միևնույն ժամանակ Հայաստանը ՄԱԿ ԳԱ-ում չի աջակցում փախստականների վերադարձին առնչվող բանաձևին»։
Հիշեցնենք, որ Վրաստանում Հայ առաքելական եկեղեցուն իրավաբանական անձի կարգավիճակ տրամադրելուն կտրուկ դեմ է հանդես գալիս պատրիարք Իլյա 2-րդը՝համարելով, որ այդ պլանում նախևառաջ անհրաժեշտ է անցկացնել հասարակական քննարկումներ։
