ԱԺ ՀԱԿ խմբակցության պատգամավոր Հրանտ Բագրատյանը մարտի 11-ին ԱԺ հայտարարությունների ժամին անդրադարձավ մարտի 22-ին Ազատության հրապարակում ոչ իշխանական չորս ուժերի և «Դ՜եմ եմ» շարժման հանրահավաք-երթին, նշեց, որ նպատակ ունեն այդ հանրահավաքը դարձնել ծավալվող շարժում մինչև մարտի 28-ը:
Բագրատյանը հույս հայտնեց, որ այն կվերածվի մայդանի: Նա ասաց, որ 100 անգամ բացատրել է, բայց էլի ստիպված է ասել. «Գիտեք՝ ինչ կա, ձեզ հարյուր անգամ բացատրեցի, դուք ասում եք՝ 45 տարի փող տուր, բայց կուտակելով՝ լավագույն դեպքում ութ տարի է մարդ թոշակ ստանալու։ Այդպիսի բան չկա, ես համարում եմ անհեթեթություն կամ ձեր լեզվով ասած՝ ախմախություն. սա Գինեսի ռեկորդների աստիճանի ախմախություն է, նման բան աշխարհում չկա: Սա կողոպուտ է, ո՞ւմ եք հիմարի տեղ դնում»,-ասաց նա: Բագրատյանը նշեց, որ սա միայն Կառավարության հրաժարականը չի բերելու, այլև Սերժ Սարգսյանի հրաժարականին և նույնիսկ նոր պառլամենտական ընտրությունների:
«Մենք ձեզ հարյուր անգամ խնդրել, աղաչել ենք՝ մի՜ արեք սա: Մի քանի հատ էլ դեսպան եք գտել, որ ձեզ պաշտպանեն կամ ինչ-որ գործիչներ. . . Չի կարելի նման բան անել, չի կարելի մարդուց 45 տարով փող վերցնել ու 6 տարի միայն հետ տալ… Ո՞վ է ձեզ իրավունք տվել նման կողոպուտ անելու, դրանց տեղը մենք վաղուց գիտեինք, եթե պետք լիներ, կօգտագործեինք»,- նշեց նա:
