ԱԺ ՀՀԿ խմբակցության պատգամավոր Վարդան Այվազյանի համոզմամբ՝ խորհրդարանական մեծամասնությանը չեն վախեցնում ԲՀԿ առաջնորդ Գագիկ Ծառուկյանի և ոչ իշխանական ուժերի միջև տեղի ունեցող հանդիպումները: Մարտի 12-ին լրագրողների հետ հանդիպմանը Այվազյանը նշեց, որ իրենք ոչ մի բանից չեն վախենում, չեն էլ վախենա անգամ այն դեպքում, երբ այդ ուժերը փողոց դուրս գան:
«Բայց ինչի՞ց պետք է վախենամ, ես չեմ հասկանում, մի հատ բացատրեք»,- նշեց նա՝ հավելելով, որ իր համար շատ ավելի մտահոգիչ են մեր երկրի խնդիրներն ու սոցիալ-տնտեսական վիճակը: Լրագրողները նրան հիշեցրին ՀԱԿ խմբակցության ղեկավար Լևոն Զուրաբյանի կարծիքը, որ ՀԱԿ-ԲՀԿ հանդիպումից հանրապետականները միկրոինֆարկտ կտանեն: «Տեսքիցս երևում է, որ մի երկու հատ միկրոինֆարկտ եմ տարել»,- կատակով նշեց պատգամավորը՝ միաժամանակ հավելելով, որ այդ հանդիպումից ոչ ոք միկրոինֆարկտ չի տանի: Այվազյանին չի էլ մտահոգում, որ ոչ իշխանական ուժերը լծակներ ձեռք կբերեն ու հաշվեհարդար կտեսնեն:
«Այսինքն՝ ո՞նց են հաշվեհարդար տեսնելու, կախելո՞ւ են, ուտելո՞ւ են, ի՞նչ են անելու: Ի՞նչ ենք արել, որ պատասխանատվության ենթարկեն: Որ աշխատել ենք, դրա համա՞ր պիտի ենթարկեն: Տենց որ պատասխանատվությանը նայենք, հլա շատ մարդ կա, որ պատասխանատվության պիտի ենթարկեն՝ թե՛ ըստեղ, թե՛ ընդեղ»,- համոզմունք հայտնեց նա:
Եթե անգամ ինչ-որ մեկին պատասխանատվության պիտի ենթարկեն, Այվազյանը վստահ է՝ դա ինքը չի լինի: ՀՀԿ-ական պատգամավորը կարծում է, որ եթե մեղք է գործել, անկախ նրանից՝ եթե այս կյանքում պատասխանատվության կենթարկվի, թե ոչ, Աստծո առաջ պատասխան կտա:
