18-րդ դարի իտալացի նկարիչ Ֆրանչեսկո Գվարդիի «Տեսարան Ռիալտոյի կամրջին» նկարը Sotheby’s աճուրդների տանը վաճառվել է 44 միլիոն դոլարով: Այս կտավը համարվում է Գվարդիի լավագույն գործերից մեկը և դարձել էր երեկվա աճուրդի ամենաթանկ լոտերից մեկը: Գնորդը ցանկացել է անհայտ մնալ: Վճարված գինը գերազանցել է մասնագետների գնահատած 40 միլիոն դոլարը:
Նշվում է նաև, որ «Տեսարան Ռիալտոյի կամրջին» կտավը դարձել է Sotheby’s-ի այս տարվա ամենաթանկ լոտերից մեկը: Գվարդիի գործերի մեջ, որոնք երբևէ վաճառվել են աճուրդների ժամանակ, այն նույնպես ամենաթանկն է: Այն Գվարդիի ամենամեծ նկարներից է (նկարի չափերն են 120×203 սմ): Նրա վրա պատկերված է Վենետիկի ամենահայտնի և ամենահին կամուրջներից մեկը՝ Գրանդ Կանալի (Մեծ Ջրանցք) վրայի Ռիալտոյի կամուրջը: