Հուլիսի 6-ին, ինչպես սովորաբար չորեքշաբթի օրերին, Բելառուսի տարբեր քաղաքներում տեղի է ունեցել ընդդիմության կողմից ավանդաբար կազմակերպվող «լուռ ակցիան», որի ժամանակ բողոքի դուրս եկածները չեն վանկարկում, խոսում, պաստառներ պահում, այլ ուղղակի ծափահարում են և ծիծաղում, ինչը, բնականաբար, լուրջ անհանգստություն է առաջացնում ռեժիմի ներկայացուցիչների համար: Բանն այն է, որ այս ակցիայի մասնակիցների թիվը և աշխարհագրությունը գնալով մեծանում է, ինչին նպաստում է նորանկախ Բելառուսի պատմության մեջ տնտեսական ամենալուրջ ճգնաժամերից մեկը:
RIA-Novosti-ի փոխանցմամբ՝ ավելի քան 200 մարդ բերման է ենթարկվել Վիտեբսկի շրջանում, 20-ը՝ Մոգիլյովի: Մինսկի մարզում այդ թիվը կազմել է 60 մարդ: Մայրաքաղաքի տվյալները չեն հաղորդվում: Ոստիկանությունում ասել են, որ մի մասի նկատմամբ կկիրառվի վարչական տույժ, մնացածին բաց կթողնեն:
Բելառուսական ընդդիմադիր աղբյուրները հաղորդում են ավելի քան 400 բերման ենթարկվածի մասին: Նշվում է, որ հատուկջոկատայիններն ու քաղաքացիական հագուստով երիտասարդները բիրտ ուժ են կիրառել ցուցարարներին բերման ենթարկելիս:
