YouTube-ի Netflix պաշտոնական ալիքում հրապարակվել է երաժիշտ Բոբ Դիլանի համերգային շրջագայության վերաբերյալ Մարտին Սքորսեզեի նոր վավերագրական կինոնկարի թրեյլերը:
Բացառիկ հարցազրույցներ, համերգների եզակի արխիվային կադրեր, ավելի վաղ չհրապարակված երաժշտական նյութ. այս ամենը և բազմաթիվ այլ բաներ են տեղ գտել Մարտին Սքորսեզեի «Rolling Thunder Revue: A Bob Dylan Story By Martin Scorsese» ֆիլմում, հայտնել է Variety հանդեսը:
Rolling Thunder Revue համերգային շրջագայությունն անցկացվել է 1975-1976 թվականներին: Դրան մասնակցել են այն տարիների ֆոլքի բազմաթիվ աստղեր:
Սպասվում է, որ ֆիլմում կլինեն ոչ միայն վավերագրական, այլև խաղային նկարահանումներ, ինչպես նաև Rolling Thunder Revue-ի գրեթե բոլոր մասնակիցների հարցազրույցները, որոնք ֆիլմի համար վերցրել է Բոբ Դիլանի պրոդյուսեր Ջեֆ Ռոզենը:
Սա Մարտին Սքորսեզեի երկրորդ աշխատանքն է ամերիկացի մեծ բանաստեղծի և երաժշտի մասին: Առաջին ֆիլմը, որը կրում է «Տունդարձի ճանապարհ չկա» անվանումը, էկրան է բարձրացել 2005 թվականին:
«Rolling Thunder Revue: A Bob Dylan Story By Martin Scorsese» կինոնկարի պրեմիերան Netflix ալիքով կկայանա հունիսի 12-ին, հաղորդել է ՌԻԱ Նովոստին:
