«Հայկական Ժամանակը»-ն գրում է. Երևանի թատրոնի և կինոյի պետական ինստիտուտի ռեկտորի թափուր պաշտոնը զբաղեցնելու համար դեռևս մրցույթ չի հայտարարվել, և հայտնի էլ չէ, թե երբ է հայտարարվելու: ՀՀ կրթության և գիտության նախարարության հասարակայնության հետ կապերի և տեղեկատվության վարչության պետ Արթուր Բաղդասարյանը մեր զրույցում ասաց, որ մրցույթը հայտարարվում է նախարարի համապատասխան հրամանով, որը չկա:
Պետք է ենթադրել, որ ԿԳ նախարարությունը դեռևս չի կողմնորոշվել Թատերականի նոր ռեկտորի ընտրության հարցում, որովհետև որքան էլ, համաձայն կարգի, այն մրցույթով է, ռեկտորի ընտրությունը, որպես կանոն, կատարվում է «վերևներում»` նախօրոք: Այս ընթացքում շրջանառվել են թեկնածուների տարբեր անուններ, մասնավորապես` դերասան, ռեժիսոր Արմեն Էլբակյան և Երևանի քաղաքապետի տեղակալ Արամ Սուքիասյան:
Նշենք, որ Երևանի թատրոնի և կինոյի պետական ինստիտուտի ռեկտորի պաշտոնը թափուր է Արմեն Մազմանյանի մահից հետո, ով կյանքից հեռացավ հունվարի 8-ին: Առայժմ ինստիտուտն ունի ռեկտորի ժամանակավոր պաշտոնակատար: Դա ընդհանուր հարցերով և ֆինանսատնտեսական գծով պրոռեկտոր Հովիկ Մինասյանն է:
