Թուրքական «Անատոլու» գործակալությունը պատրաստել է պատմական Հայաստանի Անի քաղաքին նվիրված ակնարկ, որում փորձ է արվում «ջնջել» հայկական հետքը: «Ակօսի» տեղեկացմամբ՝ ըստ պաշտոնական գործակալության համարում ունեցող «Անատոլուի»՝ 7 հազար տարվա պատմություն ունեցող քաղաքի առաջին բնակիչները թուրքերն են, իսկ Անիի ամենակարեւոր մշակութային ժառանգությունը` մզկիթները:
«Ակօսը» «Անատոլուի» այս քայլը համեմատում է 2008-ին Թուրքիայի մշակույթի նախարարության կողմից Անիի վերաբերյալ պատրաստած պատմական մի ակնարկի հետ, որում «հայ» բառն ընդհանրապես տեղ չէր գտել:
«Անիի պատմությանը նվիրված հոդվածում ամեն ինչ կա՝ բացի հայերից»,- շարունակում է «Ակօսը»: Այսպես` իբրև Անիի առաջին բնակիչներ՝ ներկայացվում են սաքա թուրքերը, որոնք, իբր, քաղաքում հաստատվել են Ք. ա. 5000-ական թվականներին, ապա հիշատակվում են տարբեր ժամանակներում քաղաքը կառավարած տարբեր պետություններն ու իշխանությունները` Սասանյանները, Բաղրատլը իշխանությունը (Բագրատունիներ. «Ակօս»), Շատտատյանները, վրաց աթաբեկները, մոնղոլները, կարակոյունլուները, աքկոյունլուները, օսմանյան և ռուսական կայսրությունները:
Թուրքիայի մշակույթի նախարարության քննադատությունից հետո «Անատոլու» գործակալությունը Անիում եղած քաղաքակրթությունների շարքից հանել է, այսպես կոչված, սաքա թուրքերին և փոխարենը տեղ է հատկացվել ուրարտացիներուն: «Ակօսը» ուշադրություն է դարձնում նաև այն հանգամանքին, որ Բագրատունիների մասին խոսելիս նրանց ազգային ծագումը չի ներկայացվում:
Վերջերս թուրքական մի շարք թերթեր գրել էին, որ հայ զբոսաշրջիկները մեծ վնաս են հասցնում Անիին: Պատմամշակութային ժառանգության պահպանմամբ մտահոգված` շրջանի բնակչությունը դիմել էր համապատասխան մարմիններին` ասելով, թե պետք է կանխարգելիչ քայլեր ձեռնարկել: Թուրքերը հատկապէս վերջին շրջանում ոչ թե «Անի» են գրում, այլ` «Անը» (թուրքերեն «հուշ»)` պնդելով, որ դա քաղաքի իսկական անունն է:
