Ապրիլյան քառօրյան ուսումնասիրելու նախաձեռնությունը նախկին իշխող համակարգին հարող մի շարք շրջանակներում առաջացրել է բացասական արձագանք, ընդհուպ գնահատականների, թե դրանով «ջուր է լցվում» հակառակորդի «ջրաղացին»: Այդ հնարքն, ի դեպ, առատորեն կիրառվում էր այդ համակարգի իշխանություն եղած ժամանակ, երբ որևէ մեկը փորձում էր բարձրացնել կոռուպցիայի, անիրավության վերաբերյալ հարցադրումներ: Ապրիլյան քառօրյա պատերազմում, սակայն, բոլորս տեսանք, որ այդպիսով փակվել են բերաններ ընդամենը մի բանի համար՝ որ հանրությունը չկարողանա փակել գանձագողության և կոռուպցիայի կանաչ ճանապարհները:
Թեմայի շուրջ «Առաջին լրատվական»-ի հետ քննարկմանը մասնակցեցին «Քաղաքացու որոշում» կուսակցության քաղաքական խորհրդի անդամ Հայկ Սահակյանը, քաղաքագետներ Արմեն Հովհաննիսյանը և Արմեն Վարդանյանը:
Անդրադառնալով դիտարկմանը, որ քննիչ հանձնաժողովը ձևավորելու գաղափարը կյանքի է կոչվում դատական իշխանությունում առաջացած ճգնաժամի պայմաններում, Արմեն Հովհաննիսյանը նշեց, որ արդարադատության համակարգի նկատմամբ Հայաստանում վստահությունը չափազանց ցածր է, և այդպիսի կարևորագույն հարցի ուսումնասիրումը վստահություն չվայելող մարմիններին վստահել, նշանակում է խնդրին լուծում չտալ, բայց այս խնդիրը լուծում է պահանջում: «Լավ կյանքից չէ, որ այդ հանձնաժողովն ստեղծվում է, բայց այն պետք է վայելի հանրային վստահություն: Ապրիլյան քառօրյային քաղաքական գնահատական չի տրվել, գնահատական պետք է տրվի»,- նշեց քաղաքագետը:
«Նման խորքային և կարևորագույն հարցը պետք է այնպես քննարկվի, որ դրանից հետո հանրության մոտ հարցեր չառաջանան, ընդհակառակը՝ առաջացած հարցերն արդյունավետ լուծումներ պետք է ստանան»,- նշեց Հայկ Սահակյանը՝ հավելելով, որ լավ կլիներ, եթե միայն ԱԺ-ում ներկայացված կուսակցությունները չներգրավվեին այս քննարկմանը, այլ ավելի լայն շրջանակներ ընդգրկվեին՝ արտախորհրդարանական ուժեր, մասնագետներ և այլն»:
Արմեն Վադանյանի դիտարկմամբ՝ տեսականորեն հնարավոր է, որ իշխանության այս նախաձեռնությունը վերածվի մահակի. «Այդ հանձնաժողովը պետք է կազմված լինի արդար մարդկանցից և իր աշխատանքը իրականացնի քաղաքական կոնյուկտուրայից դուրս, պետք է ներգրավվեն պրոֆեսիոնալներ՝ որպես խորհրդատուներ»,- նշեց քաղաքագետը:
Մանրամասն՝ տեսանյութում:
