Երևան քաղաքի առաջին ատյանի ընդհանուր իրավասության դատարանի Աջափնյակի նստավայրում երեկ հինգ ժամ շարունակ տեղի է ունեցել ՀՀ դատավորների արտահերթ ընդհանուր ժողովը: Նախկինում ևս նման ժողովներ տեղի են ունեցել, սակայն դրանք չեն գրավել հասարակության հետաքրքրությունը՝ իրենց կանխատեսելի ընթացքի, միօրինակության հետևանքով։ Երեկվա ժողովն ինտրիգային էր, ու թեև այն նախապես հրավիրվել էր հավանաբար հակազդելու համար Նիկոլ Փաշինյանի մայիսի 20-ի ելույթին ու դատարանների մուտքերի շրջափակման նախաձեռնությանը, սակայն վստահաբար հեղափոխական ընթացք ունեցավ, համենայնդեպս՝ երկար քննարկումների արդյունքում ծնված հայտարարության տեքստը նույնիսկ այդպիսին կարելի է համարել Հայաստանի դատական համակարգի համար։
Թեմայի շուրջ «Առաջին լրատվական»-ի հետ քննարկմանը մասնակցեցին քաղաքագետներ Ստեփան Սաֆարյանը, Հայկ Սուքիասյանը և վերլուծաբան Հակոբ Բադալյանը:
Ստեփան Սաֆարյանի դիտարկմամբ՝ դատական համակարգը չի կարող քաղաքական մեծ դիմադրություն առաջացնել. «Դատական համակարգը հեշտ է հանձնվելու… Լավ կլիներ, որ դատավորները մի կողմ թողնեին գործընկերային համերաշխության սկզբունքը և հենց իրենք ակնհայտ դարձնեին ու իրավական գնահատական տային վերջին շրջանում հասարակությանն ալեկոծած ապօրինի դատական վճիռներին»:
Քաղաքագետի խոսքով՝ լավ պետություն դառնալու համար պետք է բացառել «սամասուդներն» ու հաշվեհարդարները:
Հակոբ Բադալյանի խոսքով՝ դատական համակարգը նախկին իշխանության օրգանական շարունակությունն է, հետևաբար չի կարող դիմադրունակություն ունենալ: Միայն Գագիկ Հարությունյանի հրաժարականը խոսում է այն մասին, որ այդ համակարգում դիմադրության խնդիր չկա, կա ընդամենը քաղաքական պրոցեսների և տրամաբանության խնդիր:
Այնուամենայնիվ, կան դատավորներ, որոնք դիմադրություն են ցուցաբերում, անգամ գտնվեց մեկը, ով վախեցողներին առաջարկեց՝ «չիշիկ խմել»: Անդրադառնալով այս դիտարկմանը, Ս. Սաֆարյանը նշեց. «Այդ դատավորը՝ «չիշիկ խմելու» իր հորդորով, իր այդ «ստրիպտիզով» բնորոշեց հենց դատաիրավական համակարգի վիճակը, փաստորեն կան դատավորներ, որոնք տարրական դաստիարակության խնդիր ունեն և դատավորի թիկնոց կրելու արժանիքներ չունեն»:
Քննարկման մասնաիցների դիտարկմամբ՝ Հայաստանը պետք է շարժվի վեթինգի ճանապարհով, բայց զգույշ:
Մանրամասն՝ տեսանյութում:
