Լիբանանահայ բանաստեղծ-հրապարակախոս Սագո Արեանը «Առաջին լրատվականի» հետ զրույցում նշեց, որ միջազգային տրիբունալի կողմից Լիբանանի նախկին վարչապետ Ռաֆիկ Հարիրիի սպանության մեղավորների անունները հրապարակելուց հետո Լիբանանում հակամարտությունը ընթանում է քաղաքական ոլորտում, մասնավորապես մեծ բևեռացում կա իշխանության՝ «Մարտի 8-ի» և ընդդիմության՝ «Մարտի 14»-ի ուժերի միջև: Ավելին՝ Արեանի խոսքերով, այս ամենի վրա ազդում են տարածաշրջանային կոնֆլիկտները. «Այս երկու ուժերից յուրաքանչյուրը տարածաշրջանային տարբեր ուժերի կողմից են հովանավորվում: Խաղացողներից մեկը Իրանը և Սիրիան են, մյուս կողմից՝ Սաուդյան Արաբիան, Թուրքիան և Արևմուտքը»:
Սակայն, ըստ Արեանի, այս ամենը չի կարող պատճառ հանդիսանալ, որպեսզի Լիբանանում ներքին հուզումներ և բախումներ լինեն. «Միշտ խոսում են ներքին լարվածության, քաղաքացիական պատերազմի մասին, և դա հիմնականում շահարկվում է արևմտյան մամուլի կողմից, սակայն ներկայումս դրա համար հիմք չեմ տեսնում: Լիբանանը պատրաստ չէ այդպիսի արկածախնդրության, ավելին՝ երկրում բանակը շատ ուժեղ է, և ժողովրդի մեջ հակամարտության ոգի չկա»:
Սագո Արեանը նշեց, որ կառավարությանը երկու ամիս ժամանակ է տրվել, որպեսզի այդ ընթացքում ամբաստանյալներին հանձնեն միջազգային դատարան: Նրա գնահատմամբ՝ կառավարությունը միջազգային տրիբունալի նշած մեղավորներին չի հանձնի միջազգային դատարան, և արդեն իսկ խոսում են այն մասին, որ Ռաֆիկ Հարիրիի սպանությունը այլ երկրների ձեռքի գործն է. «Նաև խոսվում է, որ այս ամենը սարքովի է, և դրա նպատակն է «Հիզբոլլահին» զինաթափ անելը: Այս ամենը քաղաքական շահարկման հարց է»:
Արեանը նշեց, որ չհանձնելու դեպքում հնարավոր է ճնշումներ լինեն, սակայն սա առաջին դեպքը չէ, որ միջազգային տրիբունալը նման որոշում է հրապարակում և հետո հետ է կագնում դրանից. «Ո՞վ է հիմա հիշում Սուդանի նախագահի նկատմամբ եղած ամբաստանագիրը»:
Լիբանանի հայկական կուսակցությունները՝ Դաշնակցությունը և Հնչակյան կուսակցությունը, ևս գտնվում են տարբեր բևեռներում: Մասնավորապես Հնչակյան կուսակցությունը սատարում է Ռաֆիկ Հարիրիի որդուն՝ Սաադ Հարիրիին, իսկ Դաշնակցությունը կանգնած է «Հիզբոլլահի» կողքին: «Առաջին լրատվականի» հարցին, թե հնարավո՞ր է, որ դա հայկական համայնքում հակադրությունների պատճառ դառնա, Արեանը պատասխանեց, որ դա հավանական չէ, քանզի հայկական կուսակցությունները ազգային շահերը գերադասում են նման հարցերից:
