Թերակղզու իշխանությունների կողմից սահմանված արգելքների թվի ավելացումը անթույլատրելի է: Ղրիմում տեղեկատվության անկախության մակարդակը ճգնաժամային է, հայտարարել է Լրագրողներ առանց սահմանի միջազգային իրավապաշտպան կազմակերպության գլխավոր տնօրեն Քրիստոֆ Դելուարը:
«Փակված ԶԼՄ-ներ, զավթված գրասենյակներ, հարձակումներ լրագրողների վրա… Տեղեկատվական շուկայի մասնակիցները զանգվածային կամայականությունների են ենթարկվում: Ղրիմում տեղի ունեցող իրադարձությունները ողջ աշխարհին են հետաքրքրում, իսկ տարածաշրջանը վերահսկող ուժերը պարտավոր են տեղական և արտասահմանյան լրագրողներին հնարավորություն տալ կատարելու իրենց աշխատանքը»,- Դելուարին է մեջբերում УНН գործակալությունը:
Կազմակերպության տվյալներով՝ ուկրաինացի և օտարերկրյա լրագրողների նկատմամբ ուժ են կիրառում, խլում և փչացնում են տեխնիկան, թույլ չեն տալիս կատարել իրենց մասնագիտական պարտականությունները:
Ղրիմի ԻՀ-ն Նախարարների խորհրդի «ինքնահռչակ» նախագահ Սերգեյ Ակսյոնովի կարգադրությամբ, դեռ նախօրեից Ղրիմի տարածքում դադարել են հեռարձակվել ուկրաինական «1+1» և «5» ալիքները, որոնց հաճախականությունների վրա սկսել են հեռարձակվել «Национальный канал России» և «Россия 24» հեռուստաալիքները: Դրանից առաջ Ղրիմում անջատել են «Черноморка» ընդդիմադիր ալիքը, գրում է korrespondent.net-ն:
