Երևանի քաղաքապետ Տարոն Մարգարյանի հանձնարարությամբ՝ աշխատակազմի քաղաքաշինության և հողի վերահսկողության վարչության աշխատակիցների կողմից ապամոնտաժվում է Ազատության հրապարակին հարակից կանաչ գոտում նախաձեռնված ինքնակամ կառույցը:
Երևանի քաղաքապետարանի տեղեկատվության և հասարակայնության հետ կապերի վարչությունից «Առաջին լրատվական»-ին հայտնում են, որ ապօրինի շինարարություն նախաձեռնելու փաստով, «Վարչական իրավախախտումների վերաբերյալ» ՀՀ օրենսգրքի համապատասխան դրույթներով, կազմվել է արձանագրություն: Հանձնարարվել է նաև տարածքը բերել նախկին տեսքի:
Նշենք, որ կառուցման համար նախատեսվող սրճարանի անմիջապես հարևանությամբ գտնվում էր ԱԺ ՀՀԿ-ական պատգամավոր Սամվել Ալեքսանյանին պատկանող «Ռիչ» սրճարանը, որտեղ ամռանը շատ հաճախ կարելի է տեսնել ԱԺ գործարար պատգամավորին: Ըստ հավաստի տեղեկությունների՝ հենց նա էլ փորձում էր ընդլայնել իրեն պատկանող սրճարանի տարածքը:
