Վրաստանի վարչապետ Իրակլի Ղարիբաշվիլին Ուկրաինայի իշխանություններին խորհուրդ է տվել ականջալուր չլինել Վրաստանի նախկին նախագահ Միխեիլ Սաակաշվիլիի խորհուրդներին և հրաժարվել նրա ծառայութուններից:
«Անձամբ ես զարմացած եմ, որ Ուկրաինայի ներկայիս իշխանություններն ընդհանրապես շփվում են Սաակաշվիլիի հետ: Ինձ ասել են, որ նրան այնտեղ որպես խորհրդական են վերցրել, ես նաև տեսել եմ կադրեր, որոնցում Ուկրաինայի պետանվտանգության նախարարը խորհուրդներ է հարցնում Սաակաշվիլիից: Ես կարծում եմ՝ դա լուրջ սխալ է, քանի որ Սաակաշվիլին այն մարդն է, ով չկարողացավ կանխել 2008-ի պատերազմը, ինչի հետևանքով մենք ստացանք այն, ինչ ստացանք, և խորհուրդներ վերցնել նման արկածախնդրից՝ ակնհայտ սխալ է»,- հայտարարել է Ղարիբաշվիլին վրացական «Առաջին ալիքին» տված հարցազրույցում:
Վարչապետի տվյալներով՝ նախկին նախագահն Ուկրաինայում է իր քեռու՝ Թիմուր Ալասանիայի հետ, ով նախկինում աշխատել է Պետանվտանգության կոմիտեում: Բացի այդ, նրա տվյալներով՝ ուկրաինական իշխանությունների խորհրդականները կարող են դառնալ Սաակաշվիլիի «Միացյալ ազգային շարժում» կուսակցության անդամները, ինչը Կիևի կողմից մեծ սխալ կլինի:
