Грузия Online-ի փոխանցմամբ՝ Կովկասի հարցերով վրացի փորձագետ Մամուկա Արեշիձեն սպառնալիք է տեսնում Վրաստանի խորհրդարանի դիտարկմանը ներկայացված այն նախաձեռնությունը, որը ենթադրում է հասարակական իրավունքի իրավաբանական անձի կարգավիճակ շնորհել 5 կրոնական միություններին։
Արեշիձեի կարծիքով՝ համեմատաբար փոքրաթիվ կրոնական միությունները տվյալ կարգավիճակի շնորհիվ կարող են պահանջել արտոնություններ տրամադրել իրենց.
«Դա լուրջ կարգավիճակ է, և այդպիսի կարգավիճակ ստանալու դեպքում նրանք կարող են շատ բան պահանջել, եթե ցանկանան, և խնդիրներ կստեղծեն պետության համար։ Դա չի վերաբերում հրեաներին ու ավանդական իսլամ դավանողներին, քանի որ նրանք փոքրաթիվ են։ Նրանց հետ մեր բոլոր հարցերը լուծված են, նրանց բնորոշ է ավելի փոքր ագրեսիվությունը։
Ինչ վերաբերում է կաթոլիկ եկեղեցուն, մենք գիտենք նրա մտադրությունները, որոնք կողմնորոշված են ավելի մեծ տիրույթի զբաղեցմանը։ Դա զարմանալի չէ, նրանց միսիոներական գործունեությունը շատ լուրջ է, և ելնելով դրանից՝ դա որոշակի վտանգ է ներկայացնում հասարակության պառակտման համար։ Ես ոչինչ դեմ չունեմ կրոնական միությունների նկատմամբ։
Ինչ վերաբերում է Հայ առաքելական եկեղեցուն, ապա այստեղ հակամարտությունը լուրջ է։ Կարգավիճակի հստակեցումից հետո անպայմանորեն օրակարգում է հայտնվելու հայկական եկեղեցիների հարցը։ Եվ դա չի վերաբերում միայն այն 4 եկեղեցիներին, որոնց մասին խոսք գնաց Հայոց կաթողիկոսի վրացական այցի ժամանակ։ Այդ եկեղեցիների քանակը կազմում է 300։
Հայկական կողմը չհամաձայնեց Հայաստանում կարգավիճակ շնորհել վրացական եկեղեցուն։ Նույնիսկ եթե դա տեղի ունենա, հարցը կշարունակի մնալ խնդրահարույց։ Վրաստանի խորհրդարանում կրոնական միություններին կարգավիճակ շնորհելու հարցի քննարկումը որոշակիորեն կապված է Հայոց կաթողիկոս Գարեգին Բ-ի վրացական այցի հետ»։
Հիշեցնենք, որ կրոնական միություններին կարգավիճակ շնորհելուն դեմ է արտահայտվել նաև Վրաստանի պատրիարք Իլյա 2-րդը։