Ֆրանսիայի նախկին նախագահ Նիկոլա Սարկոզին հայտնվել է սկանդալի կենտրոնում: Մամուլում հայտնվել են նախկին նախագահի հեռախոսազրույցները, որոնք ձայնագրել է նրա քաղաքական խորհրդատու Պատրիկ Բիսոնը: Այս մասին գրում է France Presse-ը:
Գաղտնազերծված հեռախոսազրույցներում Ֆրանսիայի նախկին ղեկավարն անպատշաճ կերպով է արտահայտվում երկրի հայտնի քաղաքական գործիչների մասին: Վերջիններս էլ, իրենց հերթին, դժգոհել են, որ բարձրագույն մակարդակի բանակցություններին ներկա է գտնվել Սարկոզիի կինը` նախկին մոդել Կարլա Բրունին:
Նախկին նախագահի հեռախոսազրույցների գաղտնազերծումը քաղաքական գործիչների շրջանում դժգոհությունների ալիք է առաջացրել: Նրանցից ոմանք հայտարարել են, որ տվյալ իրավիճակը խոսում է ազգային անվտանգության ծառայությունների թերի աշխատանքի մասին: Բացի այդ, նրանց կարծիքով, այդ հեռախոսազրույցներում կարող է պետական գաղտնիք լինել: Քաղաքական գործիչները պահանջել են դատական կարգով արգելել ձայնագրությունների տարածումը:
