Հյուսիսային Կորեայի 33 քաղաքացի մահապատժի են դատապարտվել երկրում ձերբակալված հարավկորեացի միսիոների հետ կապերի համար: Այս մասին հայտնում է հարավկորեական «Չոսոն իլբո» պարբերականը:
Աղբյուրի խոսքով, որին հղում է անում թերթը, մահվան դատավճիռը կիրականացվի Հյուսիսային Կորեայի պաշտպանության պետական կոմիտեի գաղտնի խցերից մեկում:
Դատապարտյալները մեղադրվում են իշխանության տապալման փորձ և 500 ստորգետնյա եկեղեցիներ կառուցելու նպատակով խոշոր գումարի ստացման համար:
Անցած հինգշաբթի Կորեաների միավորման հարցերով հարավկորեական նախարարության ներկայացուցիչը կոչ էր արել Փխենյանին՝ երաշխավորել 51-ամյա Կիմ Չոն Ուկի անվտանգությունը, որը ձերբակալվել էր անցած տարվա հոկտեմբերին, և թույլ տալ նրան հանդիպել փաստաբանի և ընտանիքի անդամների հետ: Փխենյանը մերժումով էր պատասխանել:
Միսիոները հայտնել է, որ Հյուսիսային Կորեա է եկել Չինաստանից: Գործակալության տվյալներով՝ Հարավային Կորեայի բնակիչը ձերբակալվել էր այն բանի համար, որ ենթադրաբար փորձել է անօրինական հիմունքներով քրիստոնեական եկեղեցի հիմնել: Հայտնի չէ, թե նրան ինչ պատիժ է սպառնում:
