Ինչպես հայտնի է, ՀՀ կառավարությունը որոշել է գնել Երևանի ֆիզիկայի ինստիտուտի տարածքից 275.2 քառ. մետրը, դրան համապատասխան հողամասի բաժնային մասով և այն նվիրել ԵԿՄ-ին: Դրա համար կառավարությունը պահուստային ֆոնդից կվճարի 50 մլն դրամ` մոտ 122 հազար ԱՄՆ դոլար:
Ստացվում է` կառավարությունը գումարներ ունի ազատամարտիկների խնդիրներին լուծում տալու համար այն դեպքում, երբ նրանք հրապարակավ սատարում են իշխանությանը: Իշխանություններին չսատարող ազատամարտիկների, նույնիսկ հաշմանդամների համար հավելյալ գումար չկա: Անգամ եթե նրանց ընտանիքները կիսասոված են, ու նրանք ամիսներով նստացույց ու հացադուլ են անում Ազատության հրապարակում:
Առավել ուշագրավ է գործարքի պատմությունը:
Ինչպես «Առաջին լրատվական»-ի հետ զրույցում նշեց ԵԿՄ Աջափնյակի տարածքային կառույցի ղեկավար Ապրես Հովհաննիսյանը, Ֆիզիկայի ինստիտուտի տնօրինության հետ ԵԿՄ տարածքի համար բանակցել է Վերահսկիչ պալատի նախագահի տեղակալ Լևոն Յոլյանը: Ի դեպ, կառավարության նախագծով, նշված տարածքի շուկայական արժեքը կազմում է 71 մլն դրամ, իսկ գույքի արագ իրացման համար լիկվիդացիոն արժեքը կարող է կազմել 60.5 մլն դրամ: Սակայն ՎՊ փոխնախագահին, փաստորեն, հաջողվել է գինը նվազեցնել 50 մլն-ի:
Բացի դա, պարզվում է` Երևանի ֆիզիկայի ինստիտուտի ու ԵԿՄ-ի միջև տևական ժամանակ վեճ ու դատական գործընթաց է եղել:
«10 տարուց ավելի ԵԿՄ-ն զբաղեցրել է տարածքը ապօրինի ձևով»,- մեզ հետ զրույցում ասաց Ֆիզիկայի ինստիտուտի փոխտնօրեն Էդուարդ Մնացականյանը` հավելելով. «Մենք առաջարկել ենք` միանգամից գնեք մեզնից, տվեք իրանց»: Հետաքրքրվեցինք` եթե ԵԿՄ-ն իրոք ապօրինի էր զբաղեցրել տարածքը, միգուցե նրանց դուրս հրավիրեին: «Փորձել ենք, փորձել ենք անել այդ բանը»,- ասաց փոխտնօրենը: Փաստորեն չի ստացվել` նկատեցինք մենք: «Փաստորեն չի ստացվել»,- հաստատեց Մնացականյանը: Նա ասաց, որ ինստիտուտի հոգաբարձուների խորհրդի բոլոր անդամները համաձայն են եղել գործարքին:
Աջափնյակի ԵԿՄ տարածքային կառույցի ղեկավար Ա. Հովհաննիսյանը զարմացավ, երբ ասացինք, որ կառավարությունը 275 քմ տարածքի համար 122 հազար դոլար է վճարել պետբյուջեից: «Չերեզչուր շատ են վճարում դրանց դրա համար: Կիասպադվալային տարածք ա, քանդված վիճակ: Ինչի են էդքան հատկացնում»,- հայտարարեց ԵԿՄ ներկայացուցիչը` հավելելով. «Ես չեմ հասկանում` ինչի են գումար տրամադրում: Ֆիզիկներին ինչի են տալիս էդ գումարը: Դա ինչի համար պիտի տան դրանց: Ի՞նչ են արել էսօր էս պետության, էս ազգի համար: Ոչ մի բան»: Ասել է թե` ֆիզիկոսները ոչինչ չեն արել այս ազգի համար, միայն դուք եք արել` նկատեցինք մենք: «Շատ կներեք: Իրանք անօրինական են սեփականացրել, որ գաք փաստաթղթերը նայեք, կտեսնեք»,-հայտարարեց ԵԿՄ-ականը:
Մեր հարցին, թե ինչ են անելու այդ տարածքում, որ չէր կարող անել Ֆիզիկայի ինստիտուտը, ԵԿՄ-ականը պատասխանեց, թե իրենք պատանի երկրապահներ են դաստիարակում, անգլերենի խմբակ են բացել. «Մենք ունենք պատանի երկրապահներ, սերմանում ենք հայրենասիրություն: Երիտասարդ թև ունենք: Վաղը պատերազմ եղավ, մենք առանց հապաղելու լինելու ենք զինվորի կողքին: Սա մի կառույց ա, որը նայում է զոհված ազատամարտիկների ընտանիքներին, վիրավորներին: Վաղը կռիվ լինի, մենք պատրաստ ենք գնալ: Ֆիզիկներն ի՞նչ պիտի անեն: Ֆիզիկները սովետի հետ գնացին, անհետացան: Էսօր ոչ մի բան չեն անում»:
Ինչ վերաբերում է տարածքը ապօրինի զբաղեցնելուն, ապա Հովհաննիսյանի խոսքերով` իրենց դեռ մինչ տարածքի սեփականաշնորհումը այն տրվել է թաղապետարանի միջոցով. «Մեզ տվել են, նոր են իրանք եկել, ուզել մեզ հանել:Տարածքը ծախելու էին, ուտեին: Ոչ թե ապօրինի, էդ ժամանակ թաղապետարանը տվեց մեզ էդ տերիտորիան: Դեռ չէին սեփականացրել»:
Մեր հարցին` արդյոք նման նվիրատվություննե՞րն են պատճառը, որ ԵԿՄ-ականներն այսօր ստանձնել են Սերժ Սարգսյանի պաշտպանի դերը, Հովհաննիսյանն ասաց. «Ո՛չ, մենք մինչև էդ էլ պաշտպանել ենք: Նախ` Սերժ Սարգսյանը եղելէ մեր նախարարը, մեր մարտական ընկերը: Նա մեր գլխավոր հրամանատարն ա, չէ՞»:
Լուսանկարը` PAN Photo-ի
