Հայաստանի իշխանությունները պատմաբաններին տրամադրում են միայն 1915-ին թուրքերի կողմից հայերի ցեղասպանությունը հաստատող արխիվների մի մասը՝ մոլորության մեջ գցելով համաշխարհային հանրությանը և հայերի երիտասարդ սերնդին: Նման հայտարարություն է արել Թուրքիայի արտաքին գործերի նախարարության մամլո քարտուղար Համի Աքսոյը, հաղորդում է Anadolu գործակալությունը:
Նա նաև հիշեցրել է Մարդու իրավունքների եվրոպական դատարանի որոշումը, ըստ որի հայերի ցեղասպանության ժխտումը չպետք է որպես հանցագործություն դիտարկվի: Նրա խոսքերով, այն բանում, որ դա իսկապես ցեղասպանություն էր, շատ հայտնի գիտնականներ են կասկածում:
«Թուրքիային մշտապես մեղադրում են պատմական իրողությունները չճանաչելու մեջ: Սակայն, հաշվի առնելով վերոնշյալը, կարելի է հստակ հայտարարել, որ նմանատիպ հայտարարությունները անհիմն են և իրականում խոսքի ազատության իրավունքի խախտման փորձ է արվում»,- Աքսոյի խոսքերը մեջբերում է գործակալությունը:
Բացի դրանից, Թուրքիայի արտգործնախարարության ներկայացուցիչը Ֆրանսիայի իշխանություններին մեղադրել է, որ նրանք «100 տարի առաջ զինել են հայկական հանցավոր խմբավորումները, որոնք սպանում էին թուրքերին»: Փետրվարին Ֆրանսիայում պաշտոնապես հաստատվել է Հայոց ցեղասպանության զոհերի հիշատակի օրը:
Ապրիլի 25-ին «հայկական հանցավոր խմբավորումների մասին, որոնք սպանում էին թուրքերին, այդ թվում՝ կանանց և երեխաներին» պատմել է Թուրքիայի նախագահ Ռեջեփ Թայիփ Էրդողանը: Նա ընդգծել է, որ հայերի տեղահանությունը թուրքական տարածքից արդարացված էր, և Թուրքիան ցեղասպանության մեջ մեղադրող պետություններն իրենք են մեղավոր զանգվածային սպանությունների համար:
Հայերի ցեղասպանությունը Առաջին համաշխարհային պատերազմի ընթացքում և դրանից հետո Օսմանյան կայսրության տարածքում էթնիկ հայերի սիստեմատիկ ոչնչացումն է: Տարբեր աղբյուրների համաձայն, այդ իրադարձությունների արդյունքում զոհվել է 800 հազարից մինչև 1.5 միլիոն հայ: