ՊՆ տեղեկատվության և հասարակայնության հետ կապերի վարչության պետ, Արցախյան ազատամարտի մասնակից, գեներալ-մայոր Վարդան Ավետիսյանն այսօր լրագրողների հետ հանդիպմանը խոսելով Ռազմադաշտային հրամանատարների խորհրդի մասին՝ ասաց, որ խորհրդի անդամների հետ մի քանի անգամ հանդիպումներ են կազմակերպել և փորձել հասկանալ` ինչ են ուզում, ինչ խնդիրներ են բարձրաձայնել: «Նրանք սկզբում երկրի սոցիալ-տնտեսական իրավիճակի հետ կապված հարցեր էին բարձրաձայնում, սակայն հետո պարզվեց, որ այդ ազատամարտիկները այլ խնդիրներ ունեն, ավելի շատ դրդում են քաղաքական նկրտումները, իշխանափոխության, անվստահության հարց սկսեցին բարձրացնել: Ցավալին այն է, որ տարաձայնություններ սկսեցին առաջանալ և մեկը մյուսին պիտակավորել, ավելի վուլգար, գռեհիկ կեցվածք դրսևորել, որոշ խմբավորումներ, մասնավորապես Սուրեն Սարգսյանը, սկսեց հայտարարություններ անել»,- նշեց բանախոսը:
Անդրադառնալով Ռազմադաշտային հրամանատարների խորհրդի անդամ Սուրեն Սարգսյանին՝ նա ասաց, որ այդ մարդը չի կռվել, թե ինչո՞ւ են նրան ներկայացնում որպես ազատամարտիկ՝ ինքը չի հասկանում:
Նրա հավաստմամբ` խորհրդի շարքերում կան և կռված տղաներ, սակայն նրանց հետևում կան հրահրողներ, նենգարկողներ, որոնք օգտվելով այս մարդկանց ոչ մասնագիտական կարողություններից` դրդում են գործողությունների, որը պետք է բերի երկրի ապակայունացմանը: «Օր օրի ավելի ցինիկ, սադրիչ հայտարարություններով են հանդես գալիս, և այն ուղղված է առաջին դեմքի մակարդակով մարդկանց, իրավապահ մարմիններին: Հայտարարություններ են անում` առանց հաշվի առնելու, թե ինչպես են պետությունները կործանվում, վայրիվերումներ տեղի ունենում, զոհեր լինում»,- ասաց ՊՆ տեղեկատվության և հասարակայնության հետ կապերի վարչության պետ:
Վարդան Ավետիսյանն ասաց, որ ինքը հանդիպել է դաշտային հրամանատարներին, զրուցել նրանց հետ և եկել են այն եզրակացության, որ պետք է համատեղ ուժերով պայքարել այն մարդկանց դեմ, ովքեր պատերազմում չեն եղել. «Զարմանալին այն է, որ այդ մարդկանց հավատացողներ կան, մենք պետք է սթափության կոչ հնչեցնենք»:
